Frikë nga murtaja, OBSH-ja i kërkon Moskës sqarime për rastin e dytë të dyshuar

Organizata Botërore e Shëndetësisë njoftoi se ka kërkuar informacion nga autoritetet ruse në lidhje me raportet e një punonjësi të dytë të laboratorit me pneumoni me shkak të papërcaktuar.

OBSH-ja kërkoi gjithashtu informacione të mëtejshme për të sqaruar shkakun e pneumonisë së rëndë dhe patogjenin që çoi në masa të shëndetit publik, tha ajo në një deklaratë të martën.

Agjencia ruse e shëndetësisë tha të martën se nuk ishte zbuluar asnjë rast i murtajës tek askush që kishte rënë në kontakt me një punonjës laboratori në institutin siberian të murtajës, i cili vdiq javën e kaluar.

Por SHBA-të gjithashtu kanë kërkuar zyrtarisht më shumë informacion nga Rusia pas vdekjes së punëtorit në Siberi, tha një zëdhënës i Departamentit të Shtetit të SHBA-së vonë dje, të martën në mbrëmje, në Uashington.

“Ne kemi kërkuar zyrtarisht informacione shtesë nga qeveria ruse”, vuri në dukje ai, duke shtuar se Uashingtoni është “gjithashtu në kontakt zyrtar” me kryeqytete të tjera “me qëllim shkëmbimin e informacionit”.

Kujtohet se studiuesi, një teknik laboratori 28-vjeçar në Institutin e Kërkimit të Murtajës në Irkutsk në Siberi, në qytetin Shelekhov, vdiq pasi u diagnostikua me pneumoni me origjinë “të panjohur”, sipas Rospotrebnadzor, agjencisë ruse që merret me sëmundjet infektive.

Megjithatë, Rospotrebnadzor minimizoi lidhjen midis vdekjes së studiueses – e cila në mediat lokale është përmendur si Daria Sipilova – dhe punës së saj.

“Asnjë mikroorganizëm që lidhet me detyrat profesionale të punëtorit nuk u zbulua në mostrat e marra nga pacienti”, pohoi ai, duke shtuar se “situata epidemiologjike” në zonë ishte e qëndrueshme.

Megjithatë, drejtuesja e organizatës, Anna Popova, udhëtoi për në Irkutsk të premten, sipas guvernatorit lokal, Igor Kobzev, për një takim urgjent të komitetit rajonal anti-epidemik.

Takimi u mbajt në lidhje me një “rast të dyshuar të një infeksioni veçanërisht të rrezikshëm që preku një banor të rajonit”, tha Kobzev në Telegram.

Në një telefonatë të hënën, instituti ku punonte studiuesi i tha CNN se nuk komenton për incidentin.

Sekretari i Shtetit i SHBA-së, Marco Rubio, tha të hënën se qeveria po e monitoronte nga afër situatën.