Ajo që na bashkon është urgjente, ajo që na ndan pret

Shqipëria po kalon një realitet kritik. Kur të rinjtë e kanë të pamundur të përballojnë studimet apo të parealizueshëm projektin për të ndërtuar një të ardhme apo një familje për shkak të kostos së jetesës apo çmimeve stratosferike të banesave, del se anëtarët e kupolës qeverisëse kanë një, dy ose më shumë vila luksi. Çmimi i naftës është më i larti në rajon dhe papritur merret një vendim për krijimin e rezervës shtetërore, që pritet ta ngrejë një litër karburant edhe me 60 lekë të tjera.

Pronat shtetërore, asetet publike, i marrin miqtë e Kryeministrit. Rrethi i tij i ngushtë bëhet gjithnjë e më i pasur, ndërsa pensionistët mezi blejnë ilaçet dhe prindërit nuk e përballojnë dot të krijojnë kushte bazike për fëmijët.

Kur ti pret që Shërbimi Sekret të jetë i angazhuar në luftën ndaj krimit, bandave e drogës, del se qenka në shërbim të tyre.

Parkun e fundit në qytet e merr Edi Rama për ta bërë kullë.

Pra, çdo gjë është mbrapsht, është një botë totalisht distopike. Gjendemi para një rreziku kombëtar.

Kjo kanosje është shumë serioze para diferencave që kanë pjesa më e madhe e qytetarëve. Mund të jemi të ndryshëm në simpati, në ide, në qëndrime. Por ajo që kemi të përbashkët sot është determinuese. Të përbashkët kemi greminën ku po na çon kjo qeverisje. Nëse biem, nëse rrëzohemi përfundimisht si vend e si komunitet, cila do të ishte vlera e pikëpamjeve tona diverse?!

Të përbashkët kemi korrupsionin qeveritar që na vret të gjithëve njësoj. Jemi para një epidemie dhe kush bën në këto kushte si i ndryshëm apo vetjak, nuk ndihmon.

Është momenti për të dhënë shembuj e modele bashkimi. Ne si Parti Demokratike të parët. Duke nisur nga nesër në orën 10:00 para Parlamentit, ku mblidhemi me qytetarët, duke lënë mënjanë simbolet, logot apo flamujt tanë.

Kjo do të jetë një provë gjenerale për të na futur në një korsi ku hapja e dyerve dhe komunikimi me shoqërinë e me të ndryshmit nga ne të jetë modus vivendi. Partia Demokratike mund dhe duhet të jetë nismëtare e këtij bashkimi, pa kërkuar pronësi e merita. Largimi i Edi Ramës është një emergjencë që nuk pret. Ka kohë plot për gjërat që na dallojnë.