Shiste lëndë narkotike në afërsi të shkollave, arrestohet 27-vjeçari në Librazhd, procedohet shoqëruesi

Një 27-vjeçar është vënë në pranga mbrëmjesn e së martës në Librazhd, pasi tentonte të shiste lëndë narkotike në afërsi të shkollave.

Sipas raportimeve të policisë, në pranga ka rënë E. C., 27 vjeç, dhe u procedua në gjendje të lirë shtetasi M. T., 21 vjeç, pasi ky i fundit e shoqëronte dhe me vete kishte një mjet prerës.

Ndërkohë, nga hetimet ka rezultuar se 27-vjeçari jeton në Durrës, ndërsa në Librazhd ndryshonte vendbanimet me qëllim moskapjen dhe shitjen e lëndëve narkotike.

Njoftimi i plotë i policisë:

Specialistët e Seksionit për Hetimin e Narkotikëve, në bashkëpunim me specialistët e Seksionit për Mbështetjen Operacionale të Hetimit, si rezultat i administrimit të shpejtë, në drejtimin e Prokurorisë, të një informacioni të siguruar në rrugë operative, finalizuan operacionin e koduar “Zhvendosja”, në kuadër të të cilit u arrestua në flagrancë shtetasi E. C., 27 vjeç, dhe u procedua në gjendje të lirë shtetasi M. T., 21 vjeç.

Nga veprimet hetimore dyshohet se 27-vjeçari, banues në Durrës, ishte akomoduar përkohësisht në Librazhd, ku ndërronte shpesh njësinë e banimit, me qëllim shitjen e lëndëve narkotike, në doza, në afërsi të institucioneve arsimore. Gjatë kontrolleve fizike, 27-vjeçarit iu gjetën sasi të lëndëve të dyshuara narkotike Kokainë dhe Cannabis Sativa, të ndara në dhjetëra doza, gati për shitje, ndërsa 21-vjeçarit që e shoqëronte iu gjet 1 mjet prerës (thikë).

Më tej, nga verifikimet rezultoi se shtetasi E. C., automjetin me të cilin lëvizte për të shpërndarë dozat, e drejtonte pa leje.

Materialet procedurale iu referuan Prokurorisë, për veprime të mëtejshme.