Cristiano Ronaldo është një prej futbollistëve më të njohur në të gjithë botën dhe kjo është e padiskutueshme. Për këtë arsye, çdo zhvillim që lidhet me sulmuesin bëhet menjëherë lajm. Pas publikimit të një letre të hapur prej afro 2000 fjalësh në rrjetet sociale, ku Ronaldo theu heshtjen dhe dha versionin e tij për ngjarjet e fundit, deklarata e tij u analizua gjerësisht nga mediat ndërkombëtare.

Spanja flet për një “tërmet”

Mediet spanjolle e kanë cilësuar si një “tërmet” situatën e krijuar pas deklaratave të Ronaldos.

E përditshmja Marca është fokusuar te prapaskenat e zbuluara nga sulmuesi 41-vjeçar, duke vënë theksin te premtimet për menaxhimin e ngarkesës fizike që Jorge Jesus i kishte bërë gjatë takimeve private. Në këto diskutime kishte marrë pjesë edhe Simão Coutinho, drejtori sportiv i Al Nassr.

Sipas Ronaldos, këto premtime për menaxhimin e tij fizik u kundërshtuan më pas publikisht.

Një tjetër detaj i rëndësishëm i publikuar nga Ronaldo ishte se ai kishte qenë gati të tërhiqej nga kombëtarja pas Botërorit 2026. Megjithatë, sipas rrëfimit të tij, këmbëngulja e presidentit të Federatës Portugeze të Futbollit, Pedro Proença, e kishte bindur që të mos merrte atë vendim gjatë udhëtimit të kthimit.

Britanikët analizojnë fundin e një epoke

Në Angli, mediat e kanë parë çështjen kryesisht nga këndvështrimi i një periudhe të rëndësishme që po shkon drejt fundit në kombëtaren portugeze.

‘The Athletic’ ka rikonstruktuar me detaje kronologjinë e treguar nga Ronaldo: plani fillestar që ai të mos luante ndaj Norvegjisë dhe Danimarkës, urdhri i papritur për t’u nxehur gjatë ndeshjes me norvegjezët, edhe pse në fund nuk u aktivizua, si dhe refuzimi i Jorge Jesus për të ndjekur skenarin e komunikimit publik me tetë pika, i cili ishte rënë dakord më parë.

Ndërkohë, Sky Sports e ka cilësuar situatën si një ndarje me “shije të hidhur”, por nënvizon se Ronaldo nuk ka ndërmend të tërhiqet nga kombëtarja. Përkundrazi, sulmuesi është shprehur i gatshëm të pranojë edhe një masë disiplinore nga Federata Portugeze e Futbollit.

“Psikodramë” në Francë

E përditshmja prestigjioze franceze ‘L'Équipe’ e ka përshkruar situatën si një “psikodramë” me përmasa të pazakonta.

Gazeta e vendos konfliktin në një moment delikat të karrierës së Ronaldos, ndërsa vë në dukje edhe kohën e publikimit të deklaratës së tij: vetëm pak orë para lamtumirës së rivalit të tij të përhershëm, Lionel Messi, nga kombëtarja e Argjentinës.

ESPN: Ronaldo ka vendosur një ultimatum

ESPN, duke iu referuar burimeve të veta, e ka ngritur edhe më shumë tonin e krizës.

Sipas kanalit amerikan, Ronaldo ka vendosur një ultimatum: ai nuk do të rikthehet në kombëtare për sa kohë Jorge Jesus të jetë trajneri i Portugalisë.

ESPN thekson se sulmuesi ishte veçanërisht i revoltuar pasi Jesus nuk realizoi kërkim-faljen apo sqarimin publik që, sipas Ronaldos, i kishte premtuar gjatë një konference për shtyp.

Nga ana tjetër, Al Jazeera i ka kushtuar rëndësi kërkim-faljes së Ronaldos ndaj tifozëve dhe shokëve të skuadrës për largimin e papritur nga grumbullimi. Sulmuesi ka pranuar se shiriti i kapitenit sjell një përgjegjësi edhe më të madhe.

Edhe radiot dhe podcastet flasin për “C'ego'7”

Çështja nuk ka kaluar pa u komentuar as në radio dhe podcastet sportive.

Në emisionin ‘El Larguero’ të radios spanjolle Cadena SER, situata është trajtuar me një lojë fjalësh, “C'ego'7”, veçanërisht në lidhje me pjesën e dokumentit të Ronaldos ku ai përmend emrat e Pelé-së dhe Maradonës.

Kështu, deklarata e gjatë e Cristiano Ronaldos ka shkaktuar reagime të shumta në mediat ndërkombëtare, duke e kthyer konfliktin e tij me Jorge Jesus në një prej historive më të diskutuara të futbollit europian.