“Ndaloni ndryshimin e njëanshëm të kufijve të bashkive”/ Shoqata e të zgjedhurve vendorë, letër KE-së

Shoqata e të zgjedhurve vendorë i ka drejtuar një letër Këshillit të Europës dhe Kongresit të Autoriteteve Vendore, në lidhje me ndarjen e re territoriale.

Në letër, shoqata ngre shqetësimin se procesi për riorganizimin territorial po zhvillohet në mënyrë të njëanshme, pa respektuar konsultimin me qytetarët dhe pa marrë në konsideratë qëndrimet e këshilltarëve vendorë.

Më tej thuhet se 15 bashki rrezikojnë të shkrihen apo të ndryshojnë kufijtë, ndërsa banorët dhe përfaqësuesit e zgjedhur vendorë janë anashkaluar në një proces që prek drejtpërdrejt organizimin e pushtetit vendor dhe interesat e komuniteteve.

Shoqata i kërkon Këshillit të Europës dhe Kongresit të Autoriteteve Vendore të reagojnë dhe të ndërhyjnë përpara se ndryshimet të miratohen në Kuvend, duke argumentuar se pas miratimit parlamentar do të jetë më e vështirë të parandalohet dëmi që mund t'u shkaktohet komuniteteve.

Shoqata paralajmëron se çështja nuk lidhet vetëm me interesat e banorëve të këtyre bashkive, por edhe me respektimin e standardeve dhe parimeve europiane të demokracisë lokale.

Në letër thuhet se ndryshimi i kufijve të njësive vendore nuk mund të bëhet pa konsultim real me komunitetet e prekura dhe pa respektuar kuadrin kushtetues dhe angazhimet ndërkombëtare të Shqipërisë. /CNA

Dokumenta bashkëngjitur