NASA ka publikuar një imazh mbresëlënës të agimit në sipërfaqen e Marsit, të realizuar nga roveri i saj "Curiosity". Imazhi tregon dritën e diellit që ndriçon shkëmbinjtë e thyer, të formuar miliarda vite më parë, ndërsa mjeti – me përmasat e një makine – vazhdon të eksplorojë fqinjin planetar të Tokës. "Curiosity" zbarkoi në vitin 2012 në Kraterin Gale, pranë ekuatorit të Marsit, dhe që nga viti 2014 është duke u ngjitur në Malin Sharp, një mal me lartësi 5 km që ngrihet nga fundi i kraterit. Imazhi u kap nga kamera "Mastcam" e roverit me gjashtë rrota, rreth një orë pasi dielli kishte lindur mbi një peizazh ku dalloheshin shkëmbinj të gdhendur nga era në distancë. "Majat e ndritshme dhe të thyera në distancë përbëjnë një shtresë shkëmbore që duket krejt ndryshe nga të gjitha shtresat nëpër të cilat ka kaluar roveri deri më tani. Ne mendojmë se dikur ato ishin sedimente të transportuara nga era – ndoshta rërë apo edhe hi që u depozitua në krater si pasojë e aktivitetit vullkanik aty pranë. Pasi sedimenti u ngurtësua dhe u shndërrua në shkëmb, era e gdhendi atë shtresë gjatë epokave të tëra, duke krijuar kreshta të njohura si 'yardang'," tha shkencëtari planetar Ashëin Vasavada nga Laboratori i Propulsionit Reaktiv i NASA-s në Kaliforni.