Programi qeveritar “Dyfisho Sipërmarrjen Tënde” ka tërhequr interesin e qindra bizneseve të vogla dhe të mesme. Kryeministri Edi Rama bëri me dije se rreth 400 biznese janë aktualisht në proces, ndërsa deri tani janë miratuar 32 kredi, me një vlerë totale prej rreth 5 milionë eurosh.
Gjatë një takimi me drejtues të bizneseve të vogla, Rama tha se interesi për skemën është në rritje dhe se ritmi i aplikimeve dhe miratimeve është përshpejtuar.
Sipas kryeministrit, programi është konceptuar për të mbështetur sipërmarrjet që kanë kaluar fazën e parë të krijimit dhe përballimit të vështirësive dhe që tashmë kanë nevojë për financim për të zgjeruar aktivitetin e tyre.
“Dyfisho Sipërmarrjen Tënde” ofron kredi me interes deri në 2%, ndërsa shteti garanton deri në 70% të kredisë. Rama e cilësoi skemën si një instrument të krijuar posaçërisht për bizneset e vogla dhe të mesme.
“Programi ka ardhur si një nevojë për të mbështetur nga shumë afër sipërmarrje të vogla e të mesme që ia kanë dalë t’i mbijetojnë sfidave të krijimit të tyre në një treg të hapur”, u shpreh Rama.
Ai theksoi se këto biznese tashmë kanë krijuar eksperiencën dhe njohuritë e nevojshme për t’u rritur, por përballen me mungesën e burimeve financiare.
“Na vjen mirë që po shohim një rritje të interesit. Sot që flasim kemi rreth 400 biznese që janë në proces dhe 32 kredi të miratuara, për një vlerë që shkon në rreth 5 milionë euro. Ajo që na vjen mirë të shohim është ritmi i përshpejtuar. Hapësira është për shumë më tepër”, deklaroi kryeministri.
Programi synon të krijojë mundësi më të lehta financimi për sipërmarrjet që kërkojnë të zgjerojnë aktivitetin, të investojnë dhe të rrisin kapacitetet e tyre.