Michael Douglas ka rrëfyer një episod të pazakontë nga fillimet e marrëdhënies së tij me Catherine Zeta-Jones, duke zbuluar se për t’u përkushtuar ndaj aktores i dha fund brenda një dite pesë lidhjeve që kishte në atë kohë.
Detajet e panjohura më parë janë bërë publike në autobiografinë e tij të re, “One Helluva Ride”, ku aktori tregon se si nisi historia e dashurisë me gruan që më vonë do të bëhej bashkëshortja e tij.
Sipas Douglas, pas disa muajsh afrimiteti, Zeta-Jones i bëri të qartë se nuk dëshironte të vazhdonte të takohej me të nëse ai kishte marrëdhënie edhe me gra të tjera.
“Unë nuk jam e interesuar të takohem me ty nëse ti po takon edhe njerëz të tjerë”, i kishte thënë ajo, duke i kërkuar aktorit të vendoste nëse ishte gati për një marrëdhënie monogame.
Përgjigjja e Douglas e befasoi atë.
“Prit këtu, më duhet të bëj pesë telefonata të shpejta”, i tha ai.
“Pesë? Duhet të bësh pesë telefonata?!”, reagoi Zeta-Jones.
Douglas shpjegon se pas ndarjes nga bashkëshortja e tij e parë, Diandra Luker, në vitin 1995, ai kishte nisur disa marrëdhënie joekskluzive me pesë gra që jetonin në qytete të ndryshme.
Pas ultimatumit të Zeta-Jones, aktori telefonoi secilën prej tyre për t’u treguar se kishte takuar dikë me të cilën dëshironte të krijonte një lidhje serioze dhe se nuk do të mund të vazhdonte më marrëdhëniet e mëparshme. Sipas tij, të pesëja e pranuan vendimin pa probleme.
Michael Douglas dhe Catherine Zeta-Jones u njohën në vitin 1998, gjatë Festivalit Amerikan të Filmit në Deauville, në Francë. Megjithatë, takimi i tyre i parë nuk ishte aspak si një skenë romantike filmi.
Gjatë mbrëmjes, Douglas i tha aktores: “Unë do të jem babai i fëmijëve të tu”.
Deklarata e papritur e vuri në siklet Zeta-Jones, e cila vendosi të largohej nga takimi.
Vite më vonë, Douglas ka shpjeguar se ajo fjali nuk ishte një përpjekje për ta joshur, por një ndjesi që ai e kishte pasur që në takimin e parë.
“Edhe pse e kisha njohur vetëm për një mbrëmje, kishte diçka krejtësisht ndryshe tek ajo. Ishte ndryshe nga çdo grua tjetër që kisha njohur”, shkruan aktori në kujtimet e tij.
Douglas e përshkruan Zeta-Jones si “magjike” dhe thotë se që në fillim ishte i bindur se ajo ishte gruaja me të cilën dëshironte të kalonte jetën.
Pasi kuptoi se kishte lënë një përshtypje jo të mirë, ai u përpoq ta bindte aktoren t’i jepte një mundësi të dytë. Douglas i dërgoi një buqetë me lule dhe një letër ku i kërkonte falje.
Përpjekja e tij rezultoi e suksesshme. Dy vite më vonë, çifti u martua në Plaza Hotel në Nju Jork.
Michael Douglas dhe Catherine Zeta-Jones kanë dy fëmijë, Dylan dhe Carys, ndërsa aktori ka edhe djalin Cameron nga martesa e tij e parë.
Marrëdhënia e çiftit ka kaluar edhe momente të vështira. Në vitin 2013, ata u ndanë për një periudhë të shkurtër, pas problemeve shëndetësore me të cilat u përball Douglas dhe trajtimit të Zeta-Jones.
Megjithatë, ndarja nuk zgjati shumë dhe çifti arriti të rikthehej bashkë.
“Që nga momenti që u ndamë, nuk hoqa kurrë dorë nga shpresa se do të pajtoheshim. E dua Catherine në një mënyrë që nuk kam dashur kurrë një grua tjetër”, rrëfen Douglas.
Aktori e cilëson Zeta-Jones si bashkëshorten, shoqen më të mirë dhe partneren e tij të jetës.
Çifti, i cili ndan të njëjtën datëlindje, festoi 25-vjetorin e martesës në nëntor. Me këtë rast, Zeta-Jones publikoi në rrjetet sociale një mesazh emocional për bashkëshortin e saj, duke kujtuar ditën kur kishte ecur drejt altarit.
“Unë të dua sot ashtu si të doja atëherë”, shkroi aktorja në përvjetorin e martesës.