Turi i parë i Kupës së Shqipërisë dhuroi një ditë të mbushur me gola dhe rezultate interesante.
Në 13 takimet e zhvilluara më 7 tetor, rrjeta u tund plot 67 herë, duke regjistruar një mesatare prej më shumë se pesë golash për ndeshje.
Përveç numrit të lartë të golave, nuk munguan as surprizat. Dy skuadra të Kategorisë së Parë u eliminuan nga ekipe që militojnë në Kategorinë e Dytë. Eagle regjistroi një fitore 3-2 ndaj Burrelit, ndërsa Butrinti triumfoi 2-1 në transfertë përballë Orikut.
Një tjetër rezultat befasues erdhi nga Lushnja, ku skuadra vendase u mposht me shifrat e thella 0-4 nga Shiroka. Miqtë realizuan dy gola në pjesën e parë dhe dy të tjerë në minutat e fundit, duke siguruar një kualifikim bindës.
Ndërkohë, Laçi dhe Pogradeci dhuruan dy nga rezultatet më të thella të ditës. Laçi mposhti Këlcyrën 8-2, ndërsa Pogradeci shkatërroi Delvinën 7-0. Edhe Bylisi, Luftëtari dhe Apolonia siguruan kualifikimin me fitore të rëndësishme.
Në sfidat e tjera, Besa kaloi Devollin me rezultatin 4-1, Kastrioti fitoi 3-1 ndaj Luzit të Vogël, Korabi mposhti Tërbunin 2-1, ndërsa Kukësi eliminoi Erzenin pas fitores 3-2.
Një ndeshje e luftuar ishte edhe ajo mes Ilirisë dhe Veleçikut, me vendasit që triumfuan 4-3 në një përballje me shtatë gola.
Kujtojmë se një ditë më parë kishin siguruar kualifikimin edhe Skënderbeu, Flamurtari dhe Besëlidhja.
Turi i parë – rezultatet përfundimtare
Bylis 4-1 Albpetrol
Laçi 8-2 Këlcyra
Pogradeci 7-0 Delvina
Iliria 4-3 Veleçiku
Besa 4-1 Devolli
Kastrioti 3-1 Luz i Vogël
Burreli 2-3 Eagle
Korabi 2-1 Tërbuni
Luftëtari 5-0 Tomori
Kukësi 3-2 Erzeni
Apolonia 3-1 Maliqi
Lushnja 0-4 Shiroka
Oriku 1-2 Butrinti
