Çmimet e ushqimeve dhe të produkteve të tjera në Shqipëri po rriten me një ritëm më të shpejtë nga sa kishte parashikuar Banka e Shqipërisë, ndërsa presionet inflacioniste pritet të vijojnë edhe në muajt e ardhshëm.
Guvernatori i Bankës së Shqipërisë, Gent Sejko, tha se rritja e çmimeve është ndikuar kryesisht nga kostot dhe zhvillimet në tregjet ndërkombëtare, por edhe nga faktorë të brendshëm të ekonomisë.
“Rritja e çmimeve ka ardhur kryesisht nga faktorë që lidhen me kostot dhe tregjet ndërkombëtare, por edhe nga zhvillimet e brendshme të ekonomisë. Këto presione janë reflektuar më shpejt nga sa kishim parashikuar në projeksionet tona”, u shpreh Sejko.
Sipas parashikimeve të Bankës së Shqipërisë, presionet mbi çmimet pritet të jenë të përkohshme dhe të zbuten gradualisht. Megjithatë, inflacioni mund të vijojë të mbetet nën presion të paktën deri në gjysmën e vitit të ardhshëm.
“Presim që këto presione të jenë të përkohshme dhe gradualisht të zbuten. Nëse nuk do të ketë goditje të tjera të jashtme, kushtet monetare dhe zhvillimet ekonomike pritet të ndihmojnë në kthimin e inflacionit drejt nivelit të synuar”, tha guvernatori.
Në anën tjetër, Sejko vlerësoi se ekonomia shqiptare vijon të shfaqë qëndrueshmëri dhe se aktiviteti ekonomik pritet të ruajë një ecuri pozitive. Sipas tij, konsumi, investimet dhe aktiviteti në sektorët kryesorë të ekonomisë po mbështesin rritjen.
“Ekonomia shqiptare vazhdon të shfaqë një qëndrueshmëri të mirë, e mbështetur nga konsumi, investimet dhe aktiviteti në disa prej sektorëve kryesorë. Kjo na jep një bazë të mirë për të ruajtur një perspektivë pozitive për aktivitetin ekonomik”, deklaroi Sejko.
Pavarësisht presioneve të shtuara inflacioniste, Banka e Shqipërisë ka vendosur të mbajë të pandryshuar normën bazë të interesit për lekun, në nivelin 2.5 për qind.