“Baticë e kuqe” në Anfield, tifozët e Liverpoolit përgatiten për pritje elektrizuese ndaj Manchester Cityt

“Baticë e kuqe” në Anfield, tifozët e Liverpoolit përgatiten për pritje elektrizuese ndaj Manchester Cityt

Kjo do të jetë ndeshja e parë e Manchester Cityt pas vendimit të komisionit të pavarur për çështjen e shkeljeve të rregullave financiare të Premier League, duke e kthyer përballjen në një sfidë me ngarkesë të shtuar edhe jashtë fushës.

Grupet e tifozëve të Liverpoolit kanë organizuar një pritje përgjatë një prej rrugëve pranë Anfieldit, në itinerarin ku zakonisht kalojnë autobusët e skuadrave. Mbështetësve u është kërkuar të marrin me vete flamuj, banderola dhe mjete piroteknike, me synimin për të krijuar atë që organizatorët e kanë cilësuar si një “baticë të kuqe”.

Përballja, e planifikuar për të dielën në orën 17:30, pritet të shoqërohet me një atmosferë veçanërisht të tensionuar në tribunat e Anfieldit.

Tifozët e Liverpoolit e konsiderojnë klubin e tyre ndër skuadrat që janë ndikuar nga avantazhet që Manchester City dyshohet se ka përfituar gjatë periudhës nën hetim, edhe pse Liverpooli nuk humbi drejtpërdrejt asnjë titull kampion ndaj Cityt gjatë viteve 2009–2018, periudha të cilës i referohet çështja.

Debati është lidhur edhe me sezonet pasuese, kur Liverpooli i Jürgen Klopp dhe Manchester City i Pep Guardiolës u përplasën vazhdimisht në garën për titullin e Premier League, me “Reds” që në disa raste e mbyllën kampionatin në vendin e dytë.

Manchester City ka apeluar vendimin e komisionit të pavarur. Procesi i apelit pritet të përfundojë në javët e ardhshme, ndërsa në rast se vendimi për shkeljet konfirmohet, sanksionet e mundshme pritet të përcaktohen përpara fundit të sezonit.