Prokuroria e Posaçme kundër Korrupsionit dhe Krimit të Organizuar ka dërguar për gjykim pranë Gjykatës së Posaçme të Shkallës së Parë procedimin penal ndaj katër të pandehurve, të akuzuar për veprime të lidhura me rrëmbimin dhe vrasjen e shtetasit Renis Dobra.
SPAK ka kërkuar gjykimin e Fation Bushgjokajt, Petrit Hoxhës (Çakraj), Kristë Bushgjokajt dhe Aleksandër Bushgjokajt. Sipas akuzës, ndaj tyre rëndojnë veprat penale “Rrëmbim ose mbajtje peng e personit”, e kryer në formën e veçantë të bashkëpunimit të grupit të strukturuar kriminal, “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Sipas SPAK, katër të pandehurit kanë vepruar në mënyrë të koordinuar me qëllim rrëmbimin dhe mbajtjen peng të Renis Dobrës.
Hetimi, sipas Prokurorisë së Posaçme, është mbështetur në pamjet e kamerave të sigurisë, të dhënat GPS të automjeteve të marra me qira, tabulatet telefonike dhe prova të tjera të administruara gjatë procedimit.
Nga këto të dhëna është dokumentuar lëvizja e të pandehurve në qytetin e Burrelit dhe në aksin Klos–Zenisht, në kërkim të viktimës. Pranë zonës së njohur si “Ura e Matit”, R.D. është pikasur në automjetin e tij tip “Benz” dhe, sipas SPAK, është ndjekur nga një automjet “Hyundai Santa Fe”, në të cilin ndodheshin Petrit Hoxha (Çakraj) dhe Kristë Bushgjokaj.
Sipas hetimit, këta të fundit kanë sinjalizuar Fation dhe Aleksandër Bushgjokajn, të cilët ndodheshin në një tjetër automjet, tip “Range Rover”.
Ndjekja ka vijuar deri në vendin e quajtur “Kroi i Suçit”, ku rreth orës 21:58, sipas SPAK, automjeti “Range Rover” i ka bllokuar rrugën R.D.
Prokuroria e Posaçme thotë se viktima është nxjerrë me forcë nga automjeti i tij dhe, nën dhunën e autorëve, është futur në “Range Rover”. Më pas, të tre automjetet kanë vijuar lëvizjen nga Burreli në drejtim të Ulëzës dhe Shkopetit.
Sipas SPAK, gjatë kësaj lëvizjeje R.D. është dhunuar dhe më pas i është shkaktuar vdekja. Kjo, sipas Prokurorisë së Posaçme, konfirmohet edhe nga akti i ekspertimit mjeko-ligjor.
Më tej, sipas hetimit, automjeti i viktimës, së bashku me trupin e tij, është hedhur në drejtim të ujërave të liqenit të Ulëzës, me qëllim fshehjen dhe zhdukjen e tij.
SPAK thekson se analiza e lëvizjeve të automjeteve, pamjet e kamerave të sigurisë pranë vendngjarjes, të dhënat GPS, tabulatet telefonike dhe informacionet e nxjerra nga pajisjet telefonike të personave nën hetim kanë çuar në përfundimin se plani për rrëmbimin dhe vrasjen e R.D. ka qenë i strukturuar dhe i koordinuar.
Sipas Prokurorisë së Posaçme, këto veprime janë kryer në kuadër të bashkëpunimit të posaçëm të grupit të strukturuar kriminal.