Kryeministri Edi Rama zhvilloi sot një takim me ambasadoren e re të Konfederatës Zvicerane në Shqipëri, Siri Walt.
Takimi u bë i ditur nga Ambasada e Zvicrës në Tiranë, e cila përmes një njoftimi në faqen e saj zyrtare bëri me dije se biseda u përqendrua te programi i bashkëpunimit mes Zvicrës dhe Shqipërisë.
Në fokus të diskutimeve ishte edhe progresi në forcimin e arsimit profesional, si dhe mundësitë për zhvillimin e biznesit zviceran në Shqipëri.
“Ambasadorja Walt zhvilloi takimin e parë të prezantimit me Kryeministrin Edi Rama. Diskutimet u përqendruan në programin e bashkëpunimit të Zvicrës me Shqipërinë, veçanërisht në përparimin e bërë në forcimin e arsimit profesional dhe në mundësitë e biznesit zviceran në Shqipëri”, thuhet në njoftimin e Ambasadës së Zvicrës në Tiranë.
Takimi vjen në kuadër të nisjes së detyrës së ambasadores Siri Walt në Shqipëri dhe vijimit të bashkëpunimit dypalësh mes dy vendeve.