Rubio nga Athina: As koha dhe as distanca nuk mund ta shuajnë borxhin ndaj qytetërimit

Sekretari amerikan i Shtetit, Marco Rubio, ka përcjellë një mesazh me tone të forta historike gjatë vizitës së tij në Athinë, duke vënë theksin te lidhja e hershme mes qytetërimit europian dhe atij amerikan.

Duke iu referuar monumentit antik të Parthenonit, Rubio tha se monumenti ka qëndruar për 25 shekuj, ndërsa perandori janë ngritur dhe kanë rënë nën hijen e tij.

“Për njëzet e pesë shekuj me radhë, Parthenoni ka qëndruar në këmbë. Perandori janë ngritur dhe kanë rënë nën hijen e tij”, u shpreh Rubio.

Sekretari amerikan i Shtetit theksoi gjithashtu se pasardhësit e njerëzve që ndërtuan Parthenonin, “bijtë e Athinës dhe Romës”, e çuan qytetërimin e tyre deri në skajet e botës.

Rubio e lidhi këtë trashëgimi edhe me historinë e Shteteve të Bashkuara, duke kujtuar se republika amerikane u themelua dy shekuj e gjysmë më parë, në anën tjetër të botës.

“Qëndroj këtu sot si Sekretari i Shtetit i asaj republike dhe si stërnip i kolonëve që mbërritën në Botën e Re nga Spanja”, tha ai.

Në përfundim të këtij pasazhi, Rubio nënvizoi se lidhja historike mes këtyre qytetërimeve përbën një borxh që nuk mund të fshihet nga kalimi i kohës apo distanca.

“Qëndroj këtu për të dëshmuar për një borxh që asnjë kalim kohe dhe asnjë largësi hapësinore nuk mund ta shuajë kurrë”, deklaroi Rubio.