Shembet pjesërisht pallati 7-katësh në Stamboll/ 8 persona nxirren të plagosur nga rrënojat, vijojnë kërkimet për të bllokuarit 08/10 09:03
Skema e ngjyrave
Madhësia e shkrimit
Krista Pike, gruaja e dënuar me vdekje në Tenesi, e cila javën e kaluar i mbijetoi dy injeksioneve vdekjeprurëse gjatë një ekzekutimi të dështuar, është zgjuar në spital dhe ka nisur të flasë, duke habitur mjekët dhe ekipin e saj ligjor.
Lajmin e bëri të ditur një nga avokatët e saj, Randy Spivey, gjatë një seance dëgjimore në një gjykatë të Tenesit. Sipas tij, të hënën në mbrëmje mjekët menduan se Pike kishte pësuar vdekje të trurit dhe po përgatiteshin t’i hiqnin aparaturat e mbështetjes në jetë të nesërmen.
Por të martën, Pike rifitoi vetëdijen dhe nisi të fliste.
Fjalët e saj të para, sipas avokatit, ishin: “Ku jam unë?” dhe “Kush je ti?”
Spivey tha se Pike është e zemëruar dhe e çorientuar, ndërsa po përpiqet të rikthejë kujtesën. Ajo ndodhet ende në spital dhe gjendja e saj shëndetësore mbetet e rënduar.
“Ka një mpiksje gjaku në njërin krah. Ka pneumoni. Nuk mund të gëlltisë ende, kështu që nuk ka ngrënë”, deklaroi avokati, duke shtuar se të dy krahët dhe këmbët e saj janë shumë të fryra dhe ende nuk dihet se sa lëvizshmëri do të rikuperojë.
Pas seancës, gjyqtarja Aisha Miles miratoi kërkesën e mbrojtjes për ruajtjen e të gjitha provave dhe dokumenteve që lidhen me ekzekutimin e dështuar. Urdhri përfshin edhe materialet që ndodheshin në dhomën e ekzekutimit, përfshirë tretësirën vdekjeprurëse, shiringat dhe pajisjet intravenoze.
Avokatët e Pike kërkojnë që këto prova të ruhen për t’u përdorur në një padi të mundshme kundër shtetit të Tenesit. Ata kanë kërkuar gjithashtu më shumë transparencë mbi mënyrën se si u zhvillua ekzekutimi.
Ndërkohë, në Teksas, Jamal Howard, 46 vjeç, u ekzekutua me injeksion vdekjeprurës, pavarësisht përpjekjeve të avokatëve të tij për të ndaluar ekzekutimin. Mbrojtja e tij kishte përdorur rastin e Pike për t’i kërkuar Guvernatorit Greg Abbott një shtyrje 30-ditore, por kërkesa nuk u pranua.
Ekzekutimi i Howard ishte i 30-ti i këtij viti në Shtetet e Bashkuara, të gjitha të kryera me injeksion vdekjeprurës.
Rasti i Pike ka rikthyer në qendër të debatit mënyrën se si kryhen ekzekutimet me injeksion vdekjeprurës në SHBA, veçanërisht sa i përket transparencës mbi substancat e përdorura, procedurat dhe personelin që merr pjesë në ekzekutime.
Guvernatori i Tenesit, Bill Lee, ka bërë thirrje për një moratorium mbi ekzekutimet në shtet dhe për një hetim të pavarur. Më vonë, ai pranoi edhe dorëheqjen e kreut të departamentit të korrektimeve.
Departamenti i Korrektimeve të Tenesit ka deklaruar se gjatë ekzekutimit të Pike u ndoq protokolli i miratuar, pasi shteti kishte hequr moratoriumin trevjeçar mbi ekzekutimet në maj të vitit 2025.
Top Channel
