Detaje të reja kanë dalë në dritë nga aksidenti i regjistruar mbrëmjen e kaluar në aksin nacional Korçë-Maliq, ku humbi jetën 18-vjeçari Florian Matraku, nga fshati Bulgarec i Korçës.
Sipas raportimeve në media, i riu, djali i vetëm i familjes Matraku, kishte qenë gjatë gjithë ditës duke punuar në tokën e familjes për korrjen e misrit.
Në mbrëmje, teksa autokombajna po përfundonte punën dhe duhej të dilte nga parcela në rrugën nacionale, 18-vjeçari ka dalë në rrugë për të ndaluar për pak çaste automjetet që qarkullonin, me qëllim që t’i krijonte mundësi mjetit bujqësor të kalonte në mënyrë të sigurt.
Por, pikërisht në këtë moment ka ndodhur tragjedia. Florian Matraku është përplasur nga një automjet që drejtohej nga Leonardo Skënderas, i cili është arrestuar nga policia pas aksidentit.
18-vjeçari është transportuar me urgjencë në Spitalin e Korçës, por rreth një orë pas aksidentit ka ndërruar jetë.
“Rreth orës 19:45, në aksin rrugor “Korçë-Pogradec”, në afërsi të fshatit Bulgarec, automjeti tip “Benz”, me drejtues shtetasin L. S., ka aksidentuar këmbësorin, shtetasin F. M., rreth 18 vjeç, i cili ndërroi jetë në spital. Drejtuesi i automjetit është shoqëruar në Komisariat, për veprime të mëtejshme.”– njoftoi dje policia.
