Ditën e sotme në Parlament pritet të votohet reforma e re territoriale. Seanca parashikohet të shoqërohet me debate për shkak të kundërshtive, jo vetëm nga opozita, por edhe nga brenda grupit të PS. Mazhoranca duhet të sigurojë 84 vota, me qëllim miratimin e kësaj reforme.
Ndërkohë nga ana e saj opozita ka paralajmëruar aksion si brenda parlamentit ashtu edhe jashtë. Në kuadër të zhvillimit të seancës dhe protestës, policia ka marrë masa të shtuara sigurie përreth godinës së Kuvendit. Zona përpara parlamentit është rrethuar me barriera metalike për të kufizuar afrimin e protestuesve drejt godinës. Po ashtu, forca të shumta policie janë vendosur edhe në anën e hyrjes së ministrisë së Brendshme.
