Tensione janë shënuar gjatë protestës së mbajtur këtë të enjte pranë Xhamisë së Namazgjasë, ku protestuesit kanë bllokuar qarkullimin në kryqëzimin e “Rrugës së Elbasanit”.
Protestuesit kanë zënë rrugën, duke penguar lëvizjen e automjeteve dhe duke krijuar kaos në qarkullim.
Situata është tensionuar edhe më tej pasi një drejtuese mjeti ka tentuar të kalojë në zonën e bllokuar, por është penguar nga protestuesit.
Protesta zhvillohet në një kohë kur në Kuvend po diskutohet reforma e re administrativo-territoriale, e cila parashikon reduktimin e numrit të bashkive nga 61 në 46.
Opozita kundërshton shkrirjen e 15 bashkive dhe ka paralajmëruar kundërshtimin e reformës si brenda, ashtu edhe jashtë ambienteve të Kuvendit.
Forca të shumta policie ndodhen në pranë Xhamisë së Namazgjasë, dhe rreth zonës së Parlamentit, ndërsa vijojnë përplasjet me protestuesit.
