PS-PD përplasen për Territorialen

Reforma Territoriale ka përplasur PS dhe PD në Kuvend.

Kreu i PD-së Sali Berisha ka propozuar që të mbahet një referendum dhe të jetë populli ai që të vendosë.

“Hidheni poshtë këtë projekt, për të cilin nuk ka qytetar i çdo bindje politike që voton. Hidheni poshtë dhe të vendosim sot të shkojmë sot në referendum, të pyesim qytetarët për një proces madhor që mbi të gjitha ka të bëjë me jetesën e tyre aty ku janë. Ka të bëjë me shërbimet ndaj tyre. Ka të bëjë me të ardhmen dhe zhvillimin e komuniteteve kudo që janë. Hidheni poshtë dhe të vendosim të shkojmë në referendum me dy variantet, cilin variant të votojnë qytetarët, atë variant të vijmë dhe ta sanksionojmë këtu.Kjo është e vetmja rrugë, po ju keni armiqësi me zgjedhësit, keni armiqësi me qytetarët.Ju po i plaçkisni ata në mënyrën më të tmerrshme dhe nuk çani kokën se ekzistojnë.Ju i burgosni ata, i përzini nga Shqipëria, kurse vetë si shushunja të vërteta fryheni çdo ditë, çdo muaj e më shumë”, tha Berisha.

Ndërsa nga ana tjetër kreu i grupit të PS-së, Taulant Balla është shprehur i vendosur që sot Reforma Territoriale do të votohet.

“Kjo sot do të votohet, deri të enjten tjetër mendohuni, bëni gati propozimet. Pas gati 50 ditësh do diskutojmë një propozim tjetër të bërë nga ju. Kjo sot do të votohet.

Iu kujtoj që në fund të nëntorit mbaron afati i Komisionit të Posaçëm të reformës zgjedhore për të cilën kemi ende kohë, dy bashkëkryetarët meritojnë respketin tonë për punën e bërë”, tha Balla./ CNA