“Torturë ndaj amerikanëve..”, Maduro dhe gruaja e tij përballen me akuza të reja në SHBA

Prokurorët në Nju Jork pritet të ngrenë akuza të reja ndaj ish-presidentit të Venezuelës, Nicolás Maduro, dhe bashkëshortes së tij, Cilia Flores, lidhur me torturën e dyshuar të qytetarëve amerikanë të mbajtur në paraburgim nga autoritetet venezueliane.

Sipas personave të njohur me hetimin, akuzat e reja lidhen me ndalimin e më shumë se një duzine shtetasish amerikanë në burgjet e Venezuelës gjatë periudhës kur Maduro drejtonte vendin. Një njoftim për akuzat e reja mund të bëhet të enjten.

Hetuesit po shqyrtojnë gjithashtu mundësinë e ngritjes së akuzave ndaj personave të tjerë, të dyshuar për përfshirje në torturimin e shtetasve amerikanë.

Maduro dhe Flores u kapën gjatë një operacioni ushtarak amerikan në pallatin presidencial në Karakas në janar. Ata janë deklaruar të pafajshëm ndaj akuzave për konspiracion për narkoterrorizëm dhe vepra të tjera penale dhe aktualisht mbahen në paraburgim në Nju Jork, pa mundësi lirimi me kusht.

Flores pritet të paraqitet të enjten në një seancë gjyqësore, ku avokati i saj pritet të kërkojë që ajo të kalojë në arrest shtëpiak përpara nisjes së gjyqit.

Ndërkohë, avokati i Maduros po kundërshton ligjshmërinë e arrestimit të tij dhe argumenton se ish-presidenti gëzon imunitet, pasi veprimet për të cilat akuzohet dyshohet se kanë ndodhur gjatë kohës që ai ishte në detyrë.