Autoritetet gjermane kanë zgjeruar hetimet ndaj ish-kreut të Shërbimit Federal të Inteligjencës (BND), August Hanning, 80 vjeç, i arrestuar nën dyshimin për veprimtari që lidhen me tradhtinë ndaj shtetit. Hetuesit po shqyrtojnë nëse ai ka ndarë informacione të ndjeshme me një person të lidhur me strukturat kineze të inteligjencës.
Sipas revistës gjermane Der Spiegel, e cila u referohet disa burimeve të njohura me çështjen, hetimi përfshin kontaktet që Hanning ka mbajtur me përfaqësues kinezë pas largimit nga detyra, periudhë gjatë së cilës ai ka ushtruar veprimtari si konsulent privat.
Hanning dhe ish-drejtuesi i kabinetit të tij, 64-vjeçari Manfred D., u arrestuan të martën. Prokuroria Federale dyshon se ish-bashkëpunëtori i ka siguruar Hanning për vite me radhë dokumente konfidenciale nga nivelet e larta drejtuese të BND-së.
Deri në qershor të vitit 2022, Hanning dyshohet se kishte marrë rreth 2.000 dokumente të brendshme, shumë prej të cilave përmbanin informacione të klasifikuara. Sipas prokurorëve, ai synonte t’i përdorte këto të dhëna për përfitime financiare në kuadër të aktivitetit të tij privat të konsulencës.
Hetuesit dyshojnë gjithashtu se ish-drejtuesi i inteligjencës gjermane ka përdorur informacione të klasifikuara për të përgatitur një analizë për një përfaqësues të një shërbimi të huaj inteligjence, i cili, sipas raportimeve, kishte lidhje me Azerbajxhanin. Autoritetet po verifikojnë nëse dokumenti ka mbërritur te marrësi i synuar.
Një tjetër pjesë e hetimit lidhet me komunikimet e vazhdueshme të Hanning me një përfaqësues të një shërbimi tjetër shtetëror inteligjence, të cilit dyshohet se i ka dhënë informacione politike gjatë disa viteve. Prokuroria pretendon se një pjesë e këtyre informacioneve mbështetej në dokumentet që ai kishte marrë nga ish-bashkëpunëtori i tij.
Të dy kanë mbajtur kontakte përmes aktiviteteve politike dhe ekonomike. Në vitin 2017, Wang e falënderoi publikisht Hanning për ndihmën e dhënë gjatë përgatitjes së përkthimit në gjuhën kineze të një libri me biseda të ish-kancelarit gjerman Gerhard Schröder.
Po atë vit, Hanning dhe Wang morën pjesë në një aktivitet zyrtar në qytetin Huaibei të Kinës lindore, ku diskutuan çështje të bashkëpunimit dhe zhvillimit ekonomik. Emrat e tyre u shfaqën edhe në listën e pjesëmarrësve të një konference euro-kineze në vitin 2023. Ata kanë qenë gjithashtu pjesë e një organi këshillimor të një parku ekologjik gjermano-kinez në Qingdao.
Megjithatë, Prokuroria Federale nuk ka konfirmuar nëse marrëdhënia mes Hanning dhe Wang është drejtpërdrejt pjesë e hetimit penal. Autoritetet nuk kanë bërë publik as identitetin e shërbimit të huaj të inteligjencës me të cilin dyshohet se ish-kreu i BND-së ka shkëmbyer informacione.
Avokati i Hanning, Leon Kruse, i ka kundërshtuar akuzat, duke deklaruar se klienti i tij po ndiqet padrejtësisht penalisht. Mbrojtja pranon se ish-drejtuesi i inteligjencës ka pasur në zotërim dokumente konfidenciale, por mohon se ai ua ka dorëzuar përmbajtjen e tyre palëve të treta në dëm të Gjermanisë apo se ka marrë pagesa për këtë qëllim.
Hetimet vijojnë për të përcaktuar mënyrën e përdorimit të dokumenteve të klasifikuara, personat që mund të kenë pasur qasje në to dhe nëse informacionet kanë përfunduar në duart e shërbimeve të huaja të inteligjencës.
