Në pranga është vënë një 45-vjeçar, i identifikuar me inicialet A. M., banues në Cërrik, i dyshuar si autor i zjarrvënies.
Policia ka zbardhur brenda pak orësh zjarrvënien e qëllimshme në një supermarket në lagjen nr. 3 të Cërrikut, ngjarje e ndodhur mëngjesin e sotëm.
Ngjarja u regjistrua rreth orës 07:30 të datës 8 tetor 2026, kur policia u njoftua se në ambientet e një supermarketi në lagjen nr. 3 ishte vënë qëllimisht zjarr.
Menjëherë pas marrjes së njoftimit, shërbimet e Komisariatit të Policisë Cërrik shkuan në vendngjarje dhe nisën veprimet operative dhe procedurale për identifikimin e autorit. Si rezultat, brenda pak orësh u bë i mundur identifikimi, lokalizimi dhe kapja e 45-vjeçarit.
Si pasojë e flakëve, u dogjën produkte të supermarketit, ndërsa u rrezikuan edhe punonjësit që ndodheshin në subjekt në momentin e ngjarjes.
Pas arrestimit, materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
45-vjeçari dyshohet për veprën penale “Shkatërrimi i pronës me zjarr”.
Top Channel
