Efektivët penguan mediat të mbulonin protestën/ Reagon rrjeti SafeJounalists

Rrjeti SafeJournalists ka shpreh shqetësimin serioz për raportimet se efektivë të Policisë së Shtetit kanë penguar ekipet e mediave që mbulonin protestën para Kuvendit të Shqipërisë që po zhvillohet këtë të enjte në Tiranë.

“Protesta u zhvillua ndërsa Kuvendi diskutonte reformën territoriale. Policia mbylli rrugët që të çojnë drejt Kuvendit me kordonë dhe barriera metalike, ndërsa mediat raportuan për rreth 1,200 efektivë të angazhuar. Tensionet u përshkallëzuan kur protestuesit shtynë kordonin dhe hoqën barrierat, si dhe hodhën vezë dhe mjete piroteknike në drejtim të efektivëve. Policia u përgjigj me spraj piper dhe gaz lotsjellës, dhe disa persona patën nevojë për ndihmë mjekësore.  Gazetarët që po ndiqnin protestën dalloheshin qartë nga kartat e tyre të identifikimit dhe kamerat, dhe e identifikuan vazhdimisht veten para policisë si përfaqësues të medias. Përveç pengesës në ushtrimin e detyrës së tyre gjatë raportimit, disa gazetarë u prekën gjithashtu nga spraj djegës dhe gazi lotsjellës gjatë mbulimit të protestës.

Pikërisht në këto momente publiku ka më shumë nevojë për gazetarët në terren. Perimetri i sigurisë nuk duhet të kthehet në mjet për të mbajtur kamerat larg ngjarjeve që publiku ka të drejtë t'i shohë, përfshirë sjelljen e policisë.

Raportimet e sotme nuk janë të izoluara. Vetëm në tri javët e fundit, Rrjeti ka reaguar për shoqërimin për herë të dytë të gazetares së Citizens.al, Vjolanda Peca, ndërsa raportonte nga një protestë para Kuvendit, si dhe për marrjen e raportuar të telefonit të gazetares së Syri TV, Albana Aliaj, dhe fshirjen e pamjeve të saj nga efektivë të policisë në Durrës. Në korrik, Rrjeti kishte bërë thirrje për kushte të sigurta raportimi në protestat në Tiranë. Policia e Shtetit miratoi në maj 2025 Protokollin për Sigurinë e Gazetarëve. Ajo që gazetarët raportojnë nga terreni tregon se ai nuk po zbatohet”,-theksohet në reagim.

Për këtë arsye, rrjeti SafeJournalists i bën thirrje Drejtorisë së Përgjithshme të Policisë së Shtetit të udhëzojë menjëherë dhe qartë efektivët e angazhuar në tubime publike se gazetarët, operatorët dhe fotoreporterët duhet të lëvizin dhe të punojnë lirisht. Autoritetet duhet të shqyrtojnë pa vonesë raportimet e mbledhura, të bëjnë publike arsyet mbi të cilat u kufizuan ekipet e mediave më 8 tetor dhe të mbajnë përgjegjës çdo efektiv që ka penguar gazetarët pa justifikim. Rrjeti u bën gjithashtu thirrje të zbatojnë Protokollin për Sigurinë e Gazetarëve në çdo tubim publik dhe të raportojnë publikisht për zbatimin e tij.

Rrjeti i bën thirrje edhe Agjencisë së Mbikëqyrjes Policore të shqyrtojë sjelljen e efektivëve ndaj ekipeve të mediave gjatë protestës.

Rrjeti SafeJournalists thekson se gazetarët nuk janë palë në protestë. Rrjeti u bën njësoj thirrje të gjithë pjesëmarrësve në tubime publike të respektojnë ekipet e mediave dhe të shmangin çdo pengim, frikësim apo sulm ndaj tyre./CNA