5 muaj pa paga, futbollistët e Vllaznisë bojkotojnë stërvitjen

Tensionohet sërish situata te Vllaznia vetëm pak ditë para përballjes me Dinamon. Për shkak të pagave të prapambetura prej 4-5 muajsh, futbollistët kuqeblu kanë bojkotuar për të dytën ditë radhazi stërvitjen, ndërsa titullarët dhe pjesa më e madhe e ekipit nuk kanë zbritur në fushë.

Në seancën e dytë të parashikuar për ditën e sotme, nga ekipi i parë janë paraqitur fillimisht vetëm katër futbollistë të rinj, Bizi, Uldedaj, Tahiri dhe Ara, ndërsa pjesa tjetër e skuadrës ka munguar.

Në ambientet e kompleksit sportiv kanë qenë të pranishëm presidenti Alban Xhaferi dhe drejtori i ri sportiv, Alban Hasani, të cilët kanë zhvilluar një takim me pjesëtarët e ekipit për situatën e krijuar.

Pas takimit, katër futbollistët dhe trajneri kanë zbritur në fushë për të zhvilluar seancën stërvitore, ndërsa titullarët dhe pjesa më e madhe e skuadrës kanë vijuar bojkotin.

Vllaznia ndodhet kështu në një situatë të vështirë, si në aspektin sportiv, ashtu edhe atë financiar. Kuqeblutë kanë siguruar vetëm dy pikë në pesë javët e para të kampionatit dhe aktualisht renditen në fund të tabelës, ndërsa problemet me pagesat nuk lidhen vetëm me futbollistët e ekipit të parë.

Sipas informacioneve të bëra publike, prej sezonit të kaluar mbeten të papaguara edhe pagat e trajnerëve të Akademisë së Vllaznisë. Kjo e vendos klubin përballë një situate të ndërlikuar, në një periudhë kur skuadra duhet të përgatitet për një tjetër sfidë të rëndësishme, atë ndaj Dinamos më 11 tetor në “Loro Boriçi”.