Mazniku, replikë me Braçen: Po nuk votuam reformën, humbasim momentin politik

Bashkëkryetari i Komisionit të Posaçëm për Reformën Administrativo-Territoriale, Arbjan Mazniku, ndau replika me deputetin socialist Erion Braçe.

Ky i fundit argumentoi sot në Kuvend qëndrimin e tij kundër votimit të reformës.

Në përgjigje ndaj Braçes, Mazniku tha se mosvotimi i kësaj reforme këtë të enjte do të bënte që vendi të humbte momentin e rëndësishëm të ndarjes se re territoriale, ndërsa tha se në këtë pikë, bashkitë nuk ka asnjë pengesë, as nga ligji dhe as nga qeveria për të ushtruar planifikimin urban.

“I nderuar z. Braçe i vlerësoj debatet që kemi bërë për reformën, e cila duhet të ketë jo vetëm hartat, por edhe kompetencat. Jemi në një pikë që humbasim momentumin nuk do ia dalim dot ose ia dalim përmes këtij mekanizmi që kemi sot. Për të qenë i vërtetë bashkitë nuk kanë pengesë, as nga ligji, as nga qeveria për t’i ushtruar. Planifikimi urban vendor, Lushnja e bën, Divjaka jo.

Zhvillimi i turizmit-Lushnja shpenzon, Divjaka jo. Strehimi social është një politikë që bën bashkia, Divjaka nuk e bën. Enti i banesave ka pjesën e tij  dhe i ndihmin bashkitë kur munden. Lushnja merret, Divjaka nuk merret. Kujdesi social për të sëmurët, arsimi profesional, transporti, Lushnja e bën, Divjaka jo.

Kohezioni social kërkon që planet zhvillimore  të jenë të ndërtuara nga pushteti vendor, dhe nëse nuk janë të ndërtuara nga pushteti vendor nuk financohen nga BE”,-tha Mazniku./CNA