Vllaznia po përballet me një situatë të tensionuar, vetëm pak orë pas dorëheqjes së drejtorit sportiv Vioresin Sinani. Kriza në klub është thelluar pas bojkotit të seancës stërvitore të planifikuar për sot në orën 16:00, me lojtarët që, sipas raportimeve, kanë kundërshtuar situatën për shkak të pagave të prapambetura.
Sipas raportimeve nga Shkodra, pjesa më e madhe e futbollistëve të ekipit të parë nuk është paraqitur në stërvitje. Në fushë kanë dalë lojtarë të skuadrës U19, së bashku me disa futbollistë të ekipit të parë.
Fillimisht, në ambientet stërvitore janë paraqitur vetëm katër lojtarë të rinj, Bizi, Uldedaj, Tahiri dhe Ara. Ndërkohë, të pranishëm kanë qenë presidenti Alban Xhaferi dhe drejtori i ri sportiv Alban Hasani, i cili ka marrë detyrën pas largimit të Vioresin Sinanit.
Presidenti Xhaferi dhe drejtori Hasani kanë zhvilluar një takim me pjesëtarët e ekipit, ndërsa pas bisedës katër futbollistët dhe trajneri kanë zbritur në fushë dhe kanë zhvilluar seancën stërvitore. Pjesa tjetër e skuadrës nuk është përfshirë në stërvitje.
Situata vjen vetëm pak ditë para sfidës me Dinamon, e programuar më 11 tetor në stadiumin “Loro Boriçi”.
Vllaznia e ka nisur me vështirësi këtë sezon dhe pas pesë javëve të para të kampionatit renditet në vendin e fundit, me vetëm dy pikë. Mbetet për t’u parë nëse problematikat brenda klubit do të ndikojnë edhe në përgatitjet e skuadrës për ndeshjen e radhës.