Analisti Enton Abilekaj ka ngritur pikëpyetje mbi mënyrën se si mund të zhvillohet një lëvizje politike kundër qeverisë, duke e cilësuar situatën në Shqipëri si të pazakontë për shkak të mënyrës se si perceptohet vendi edhe nga partnerët ndërkombëtarë.
I ftuar në “Çim Peka Live”, Abilekaj tha se një prej vështirësive kryesore është se ajo që shqiptarët e perceptojnë si një regjim autoritar, jashtë vendit shihet më tepër si një demokraci me probleme.
Sipas tij, pushteti funksionon përmes një sistemi që ruan fasadën institucionale dhe demokratike, duke e bërë më të komplikuar përballjen me të.
“Është një formë e re, e panjohur më parë, një regjim i fshehur në një makiazh, në një fasadë demokratike”, u shpreh Abilekaj.
Analisti argumentoi se mungesa e një qëndrimi të fortë ndërkombëtar në mbështetje të një lëvizjeje të brendshme mund të ndikojë edhe te qytetarët, të cilët, sipas tij, mund të dekurajohen nëse perceptojnë se nuk kanë mbështetje nga jashtë.
Një pjesë të kritikave Abilekaj ia drejtoi opozitës parlamentare, konkretisht Partisë Demokratike, për të cilën tha se nuk është aktualisht në pozicionin për të udhëhequr një lëvizje të gjerë mosbindjeje civile.
“PD-ja nuk është e gatshme sot, është shumë larg të qenit lidere e një lëvizjeje, mosbindjeje civile”, deklaroi ai.
Abilekaj ngriti më tej pyetjen se përse opozita nuk po arrin të komunikojë me pjesëmarrësit në protestat e fundit dhe të shndërrojë këtë mbështetje në një forcë më të madhe politike.
Ai iu referua shifrës prej 250 mijë protestuesish të deklaruar prej tij në një prej tubimeve dhe pyeti se përse opozita nuk arrin t’i afrojë këta qytetarë në aktivitetin e saj politik.
“Pse opozita nuk i ka këta 250 mijë njerëz aty? Pse nuk ka komunikim opozita me këta njerëz?”, tha Abilekaj.
Në fund, ai argumentoi se opozita ka nevojë për një ndryshim të thellë të mënyrës së reagimit, duke e lidhur këtë me krizën e besimit që, sipas tij, ekziston mes qytetarëve dhe përfaqësuesve të saj.
