Te fundit
Brenda parajsës private të Ronaldos dhe Georginës, dy vila luksoze ku shkohet vetëm me varkë ose hidroplan
9 Tetor 2026, 09:45Lifestyle
TEMA
Larg zhurmës së qyteteve, paparacëve dhe vëmendjes së vazhdueshme të publikut, Cristiano Ronaldo dhe Georgina Rodríguez kanë gjetur një destinacion që duket se i ka të gjitha: detin kristal, plazhet e bardha dhe një privatësi që pak vende mund ta ofrojnë.
Çifti ka blerë dy vila luksoze në ishullin ku ndodhet kompleksi ekskluziv Nujuma, Ritz-Carlton Reserve, pjesë e projektit turistik Red Sea në Arabinë Saudite. Por ajo që e bën këtë pronë veçanërisht tërheqëse nuk është vetëm luksi, por edhe izolimi i saj. Për të mbërritur në këtë parajsë, nuk mjafton të hipësh në makinë: udhëtimi bëhet me varkë ose hidroplan.
I vendosur rreth 26 kilometra larg kontinentit, destinacioni ofron një panoramë që ngjan me kartolinat tropikale. Ujërat bruz, rëra e bardhë dhe shkëmbinjtë koralorë krijojnë një ambient ku natyra është pjesë e përvojës së luksit.
Ronaldo dhe Georgina kanë zgjedhur dy vila me përmasa të ndryshme. Prona më e madhe ka tri dhoma gjumi dhe është menduar për pushimet me fëmijët, ndërsa vila tjetër, me dy dhoma gjumi, ofron një hapësirë më intime për çiftin.
Kompleksi Nujuma ka vetëm 19 vila private, duke ruajtur një atmosferë ekskluzive dhe larg turizmit masiv. Shërbimet e nivelit të lartë dhe vendndodhja e veçuar e bëjnë atë një zgjedhje për ata që kërkojnë jo vetëm rehati, por edhe qetësi larg syve kureshtarë.
Sipas raportimeve të mediave të huaja, vlera e dy pronave të çiftit mund të kalojë tetë milionë euro, megjithëse çmimi i saktë i blerjes nuk është bërë publik zyrtarisht.
“Ndihemi në paqe këtu”
Për Ronaldon dhe Georginën, ky vend nuk ishte një zgjedhje e rastësishme. Çifti e kishte vizituar zonën e Detit të Kuq disa herë përpara se të vendoste të blinte vilat.
Në një deklaratë të publikuar nga kompania Red Sea Global, futbollisti portugez tregoi se që nga vizita e parë kishte ndier një lidhje të veçantë me ishullin dhe bukurinë e tij natyrore.
“Deti i Kuq është vërtet një vend i veçantë. Që nga vizita jonë e parë, unë dhe Georgina ndiem një lidhje me ishullin dhe bukurinë e tij natyrore. Ndihemi në paqe këtu. Tani që kemi shtëpinë tonë, mund të kalojmë kohë cilësore me familjen, në privatësi dhe qetësi të plotë, sa herë që duam”, është shprehur Ronaldo.
Nujuma është pjesë e një projekti të madh turistik të Arabisë Saudite, që synon të tërheqë vizitorë nga e gjithë bota përmes resorteve luksoze dhe përvojave të lidhura me natyrën.
Për yllin portugez, i cili zotëron prona në disa vende të botës, dy vilat përfaqësojnë një tjetër investim në pasuri të paluajtshme. Por, ndryshe nga një rezidencë e zakonshme luksoze, këtu edhe mbërritja në shtëpi kërkon një udhëtim të veçantë.
Një parajsë ku luksi matet jo vetëm me vlerën e pronës, por edhe me atë që është gjithnjë e më e rrallë për një çift kaq të famshëm: mundësinë për të qenë larg botës, të paktën për pak kohë.
Më të lexuarat
24 oret e fundit
Javen e fundit
Blog Tema
Lini një Përgjigje