Nidal Hasan pritet të pushkatohet më 3 dhjetor në bazën Fort Hood, në Teksas. Vendimi për transmetimin e drejtpërdrejtë të ekzekutimit ngre pikëpyetje ligjore dhe konsiderohet i paprecedentë në epokën moderne.
Shtetet e Bashkuara po përgatiten për ekzekutimin e Nidal Hasan, ish-majorit dhe psikiatrit të ushtrisë amerikane, i dënuar me vdekje për vrasjen e 13 ushtarëve në bazën ushtarake Fort Hood, në Teksas, në vitin 2009.
Ekzekutimi është planifikuar për më 3 dhjetor dhe sipas sekretarit të Mbrojtjes, Pete Hegseth, publiku do të ketë mundësi ta ndjekë atë drejtpërdrejt.
Hasan pritet të ekzekutohet me skuadër pushkatimi, në atë që do të shënonte ekzekutimin e parë ushtarak në SHBA pas më shumë se 60 vitesh.
Do të sigurohemi që njerëzit të jenë në gjendje ta shikojnë, që të jetë publik, deklaroi Hegseth në një intervistë për televizionin konservator Real America’s Voice.
Ai argumentoi se njerëzit duhet të kuptojnë se veprime të tilla kanë pasoja të rënda. I pyetur nëse Hasan kishte paraqitur ndonjë kërkesë të fundit apo kishte kontaktuar presidentin Donald Trump, Hegseth u përgjigj:
Nuk më intereson. Do ta shohim më 3 dhjetor.
Pentagoni bëri të ditur se Trump kishte miratuar rekomandimin e sekretarit të Mbrojtjes për ekzekutimin. Megjithatë, mbetet e paqartë nëse presidenti mbështet edhe transmetimin e drejtpërdrejtë të tij.
Hasan, i cili shërbente si psikiatër në ushtrinë amerikane, hapi zjarr më 5 nëntor 2009 në një ndërtesë mjekësore të mbushur me njerëz në Fort Hood, duke vrarë 13 ushtarë të paarmatosur dhe plagosur dhjetëra të tjerë. Gjatë procesit gjyqësor ushtarak në vitin 2013, ai u shpall fajtor dhe u dënua me vdekje.
Në gjykatë, Hasan deklaroi se besonte se po mbronte myslimanët dhe talebanët në Afganistan, ndërsa kërkoi falje për veprimet e tij.
