Harry Styles ka rrëfyer një nga ndryshimet më të rëndësishme në jetën e tij personale, duke zbuluar se si një ish-e dashur e ndihmoi të kapërcente ankthin që ndiente sa herë duhej të dilte në publik. Këngëtari britanik, i cili në vitet e para të karrierës me grupin One Direction e kishte të vështirë të shijonte jetën jashtë vëmendjes së fansave, pranoi se dikur nuk ndihej i sigurt as kur ndodhej larg skenës. Sot, megjithatë, ai e sheh ndryshe raportin me botën përreth dhe një pjesë të këtij ndryshimi ia atribuon një lidhjeje të kaluar.
Gjatë një interviste të përbashkët me Thom Yorke për revistën Rolling Stone, të publikuar më 8 tetor, 32-vjeçari tregoi se si jeta në turne e kishte bërë të ndihej i kufizuar. “Në ditët e para, kur isha pjesë e grupit, gjithçka që lidhej me qëndrimin në hotele më dukej sikur isha i mbyllur. Kur kthehesha në shtëpi, mendoja: ‘Nuk është e sigurt për mua të dal jashtë’”, rrëfeu ai.
Gjërat nisën të ndryshonin kur ishte në një lidhje me një vajzë që, sipas tij, ishte shumë e shoqërueshme dhe e dashuronte jetën jashtë shtëpisë. Kur ajo planifikoi të vinte në Londër, Styles kuptoi se nuk mund të kalonin gjithë kohën brenda katër mureve.
“Thashë me vete: ‘Nëse rrimë në shtëpinë time për tri ditë, ajo do të mendojë se jam i çmendur’. Kështu, dolëm dhe ecëm kudo. Aty kuptova se është krejtësisht në rregull të jesh jashtë”, tregoi këngëtari. Ai pranoi se kjo përvojë i ndryshoi mënyrën se si e përjeton jetën e përditshme. “Kjo e theu atë barrierë. Tani gjërat kanë ndryshuar shumë në jetën time, sepse kështu qëndron i lidhur me botën”, u shpreh Styles.
Madje, interpretuesi i hitit “Watermelon Sugar” beson se shëtitjet dhe vëzhgimi i jetës së përditshme ndikojnë edhe në krijimtarinë e tij. Sipas tij, kur ecën, ke mundësinë të vëresh detaje që të shpëtojnë kur udhëton me makinë. Megjithatë, fakti që sot ndihet më i lirë për të dalë në publik nuk do të thotë se Harry Styles dëshiron të ndajë çdo aspekt të jetës së tij me fansat. Përkundrazi, këngëtari ka zgjedhur prej vitesh të ruajë një kufi të qartë mes famës dhe privatësisë.
Në një intervistë të vitit 2022 për Rolling Stone, ai shpjegoi edhe arsyen pse nuk dëshiron që marrëdhëniet e tij sentimentale të kthehen në një çështje publike. “Ndonjëherë njerëzit thonë: ‘Ti ke qenë publikisht vetëm me gra’, por unë nuk mendoj se kam qenë publikisht në një lidhje me dikë”, deklaroi ai, duke theksuar se fakti që dikush fotografohet me një person tjetër nuk do të thotë se ka zgjedhur ta bëjë publike marrëdhënien e tij. Styles foli gjithashtu për rrugëtimin personal të secilit drejt kuptimit dhe pranimit të seksualitetit, duke nënvizuar se kjo është një përvojë individuale që meriton privatësi.
