Dyshohet se do kryenin atentat, 3 të arrestuar në Lezhë, sekuestrohen 3 pistoleta dhe motori i vjedhur në Suedi (EMRAT)

Tre persona janë arrestuar në Lezhë, pasi dyshohet se kishin planifikuar të kryenin një vrasje. Dy prej tyre lëviznin të armatosur dhe me skafandra me një motomjet të vjedhur në Suedi, në rrugën e vjetër “Pllanë-Lezhë”, ndërsa personi i tretë do t’i ndihmonte të largoheshin nga zona pas kryerjes së krimit.

Në kuadër të operacionit të koduar “Detajet”, Policia vuri në pranga shtetasit Elden Tarja, 25 vjeç, banues në Barbullush; Kristian Ymeri (Shkambi), 34 vjeç, banues në Kamzë, dhe Vinçesk Piroli, 38 vjeç, banues në Kurbin.

Operacioni u zhvillua nga specialistët e Sektorit për Hetimin e Krimeve të Rënda në DVP Lezhë, në bashkëpunim me Policinë e Shkodrës, pas marrjes së informacionit për lëvizje të dyshimta të dy personave me skafandra në rrugën e vjetër “Pllanë-Lezhë”.

Pas kontrolleve dhe patrullimeve në zonë, shërbimet e Policisë ndaluan një automjet tip “Volkswagen” në segmentin rrugor “Gjadër-Barbullush”, ku udhëtonin tre të dyshuarit.

Gjatë kontrolleve, në automjet, në motomjet dhe në banesën e 25-vjeçarit, si dhe në ambientet përreth saj, u gjetën dhe u sekuestruan tri pistoleta me krehra e fishekë, municion luftarak, motomjeti i përdorur në këtë rast dhe automjeti tip “Volkswagen”.

Nga verifikimet rezultoi se motomjeti ishte i vjedhur në Suedi. Sipas Policisë, 38-vjeçari ka precedentë të shumtë penalë për krime kundër personit, brenda dhe jashtë vendit.