Goditet rrjeti ndërkombëtar i drogës, sekuestrohen 45 tonë kokainë

Policia Kombëtare e Ekuadorit, në bashkëpunim me Prokurorinë e Përgjithshme të Shtetit, EUROPOL-in, Gardën Civile dhe Policinë Kombëtare të Spanjës, ka zhvilluar një operacion me qëllim goditjen e një organizate kriminale ndërkombëtare të përfshirë në trafikun ndërkombëtar të drogës.

Në kuadër të operacionit u arrestuan 21 persona, 19 prej tyre shtetas ekuadorianë dhe 2 punonjës policie.

Hetimi nisi pas sekuestrimit, në tetor të vitit 2024, të rreth 13.000 pakove me kokainë në portin e Algecirasit, në Spanjë. Kontejneri ishte nisur nga një terminal portual në Guayaquil të Ekuadorit.

Si rezultat i hetimeve, janë lidhur me këtë organizatë 14 sekuestrime droge, që përfaqësojnë rreth 42,5 tonë kokainë, të regjistruara në Ekuador, Spanjë, Belgjikë, Portugali dhe Holandë, vlera e të cilave arrin në rreth 1 miliard e 680 milionë dollarë.

Gjatë operacionit të zhvilluar janë sekuestruar po ashtu 630 kilogramë dhe 1,5 tonë të tjera drogë, me një vlerë të përllogaritur prej 85 milionë dollarësh. Në total, vlera e drogës së sekuestruar arrin në 1 miliard e 765 milionë dollarë.

Organizata dyshohet se ka vepruar që prej vitit 2019 dhe se ka pasur ndikim në provincat Guayas, Los Ríos dhe Pichincha, si dhe lidhje me shtetas që jetojnë në Europë dhe në Emiratet e Bashkuara Arabe.

Hetimi ka identifikuar një rrjet me të paktën 15 kompani të angazhuara në eksportin e frutave, kakaos, produkteve të detit dhe drurit, të cilat dyshohet se përdoreshin për të fshehur ngarkesa të mëdha droge mes këtyre produkteve.

Këto grupe dyshohet se kanë pasur lidhje me struktura të organizuara kriminale të lidhura me mafien ballkanike dhe të ashtuquajturën mafie kroate, me të cilat dyshohet se koordinonin blerjen e kokainës në laboratorë në Kolumbi, transportimin e saj drejt Ekuadorit dhe më pas dërgimin me rrugë detare drejt Europës.

Jackson Felipe Zambrano, një nga personat e arrestuar gjatë këtij operacioni, dyshohet se ka qenë një nga financuesit kryesorë të Pipos që prej vitit 2022.

Në vendet e destinacionit, pjesëtarë të këtyre strukturave dyshohet se kanë marrë pjesë në pritjen dhe shpërndarjen e drogës, si dhe kanë vënë në dispozicion kompani për të krijuar marrëdhënie tregtare që dukeshin të ligjshme dhe për të kontrolluar një pjesë të zinxhirit logjistik.

Gjatë kontrolleve janë sekuestruar telefona celularë, pajisje për ruajtjen e të dhënave informatike dhe dokumentacion biznesi e financiar./ CNA