Japonia do të heqë taksën mbi ushqimet për të ulur çmimet e lehtësuar presionin ndaj familjeve

Qeveria e Japonisë miratoi të premten një projektligj për të ulur taksën e konsumit mbi ushqimet dhe pijet joalkoolike nga 8% në 1% për dy vjet, duke synuar të lehtësojë presionin mbi familjet që përballen me rritjen e çmimeve të ushqimeve.

Legjislacioni do të prezantojë gjithashtu një sistem përfitimesh monetare të lidhura me të ardhurat për personat me të ardhura të ulëta, raportoi Kyodo News.

Qeveria e kryeministres, Sanae Takaichi e ka paraqitur projektligjin në parlament dhe synon të sigurojë miratimin parlamentar gjatë seancës aktuale, e cila përfundon më 12 dhjetor, përpara se të zbatojë uljen e taksave në prill 2027.

Kjo do të ishte ulja e parë e taksës së konsumit në Japoni, që nga vendosja e saj në vitin 1989.

Norma standarde e taksës së konsumit në Japoni është 10%, me një normë të reduktuar prej 8% që zbatohet për ushqimet dhe pijet, duke përjashtuar alkoolin dhe ngrënien jashtë.

Shkurtimi i propozuar pritet të ulë të ardhurat tatimore me rreth 10 trilionë jen (63 miliardë dollarë) gjatë dy viteve, sipas Kyodo News.

Takaichi ka argumentuar se masat do të ofrojnë lehtësim nga rritja e kostove të jetesës, por qeveria ende nuk ka detajuar se si do ta mbulojë mungesën e të ardhurave.

Ligjvënësit e opozitës kanë vënë në pikëpyetje se si do të mbulohet mungesa. Plani ka ngritur gjithashtu shqetësime në lidhje me financat e qeverisjes vendore, pasi bashkitë marrin një pjesë të të ardhurave nga taksat e konsumit.

“Ne do të marrim masa për të siguruar që menaxhimi fiskal i qeverive lokale të mos preket negativisht”, i tha Takaichi Senatit të premten.

Lidhur me mënyrën e sigurimit të fondeve, Takaichi tha se kjo do të merret në konsideratë "duke pasur parasysh kuadrin më të gjerë të reformave buxhetore që do të ndiqen në të ardhmen"./ AA.