Ish-presidenti i Serbisë, Aleksandar Vuçiç, ka akuzuar kryeministrin e Kosovës, Albin Kurti, se qëndron prapa bashkimit të partive politike shqiptare në Luginën e Preshevës, në prag të zgjedhjeve parlamentare të 25 tetorit që do të mbahen në Serbi. Vuçiç është shprehur gjatë një interviste televizive se pjesmarrja e përbashkët të subjekteve politike shqiptare në këto zgjedhje, synon ndërkombëtarizimin e çështjes së shqiptarëve në Preshevë, Bujanoc dhe Medvegjë. Ish presidenti serb ka sulmuar edhe kryetarin e Partisë për Veprim Demokratik, Shaip Kamberi, i cili prin listën e përbashkët shqiptare. Vuçiç pretendon se pas këtij bashkimi qëndron një ndikim i jashtëm, duke përmendur edhe kongresistin amerikan Joe Ëilson, të cilin e ka akuzuar se po vepron në interes të shqiptarëve. Ai ka pretenduar se përfaqësuesit shqiptarë do të shfrytëzojnë lidhjet me politikanë amerikanë dhe evropianë për ta ngritur çështjen e Luginës së Preshevës në nivel ndërkombëtar. Ish-presidenti serb ka pretenduar se ekziston një faktor i jashtëm që vazhdon ta shtyjë përpara çështjen e shqiptarëve në jug të Serbisë.