Masa e sigurisë ndaj Berishës/ "Kushtetuesja" e kthen në Gjykatën e Lartë

Gjykata Kushtetuese ka pranuar pjesërisht kërkesën e kreut të Partisë Demokratike, Sali Berisha, lidhur me masën e sigurisë “detyrim për paraqitje”.

Në vendimin e saj, Kushtetuesja vlerëson se detyrimi për t’u paraqitur në Policinë Gjyqësore kufizon lirinë e lëvizjes, të garantuar nga neni 38 i Kushtetutës.

Sipas arsyetimit të gjykatës, Gjykata e Lartë nuk ka dhënë përgjigje të mjaftueshme për pretendimet që lidhen me domosdoshmërinë dhe përshtatshmërinë e kësaj mase sigurimi.

Për këtë arsye, çështja do të rikthehet për rishqyrtim në Gjykatën e Lartë, e cila duhet të marrë në konsideratë vërejtjet e Gjykatës Kushtetuese.

Megjithatë, vendimi nuk e shfuqizon automatikisht masën e sigurisë ndaj Berishës. Gjykata e Lartë duhet të shqyrtojë sërish çështjen dhe të arsyetojë mbi nevojën dhe përshtatshmërinë e masës së vendosur ndaj tij./ CNA