Votimi i Territoriales/ Berisha: Mandatet e krimit u hodhën si shigjeta kundër qytetarëve të 15 bashkive

Kryetari i Partisë Demokratike, në konferencën me gazetarët, këtë të premte, akuzoi Partinë Socialiste se miratoi reformën e re territoriale në dëm të interesave të qytetarëve të 15 bashkive. Berisha e cilësoi votimin e zhvilluar pas mesnate si një akt që u diktua nga interesat elektorale të mazhorancës dhe jo nga nevojat e komuniteteve.

“Mbrëmë pas mesnate, në një akt flagrant antikombëtar, antiqytetar, krimi, pengmarrja dhe ryshfeti, mandatet e krimit u hodhën si shigjeta kundër qytetarëve të 15 bashkive të vendit, për asgjësimin e tyre.

Deputetët e partisë së krimit në unison, shkelmuan interesat e zgjedhësve të tyre.

Të marrë peng me korrupsionin e tyre, me vjedhjet dhe plaçkën që kanë siguruar me mandatin e tyre, ata votuan në një krim kolektiv për asgjësimin e 15 bashkive.

Reforma territoriale është pa dyshim, në raport me qytetarin dhe komunitetet, reforma më e rëndësishme sepse kjo reformë ka të bëjë me vetëqeverisjen e komuniteteve.

Ka të bëjë me qeveritë vendore të tyre, të cilat kanë misionin zhvillimin e territorit të komunitetit.

Kanë mision konservimin e trashëgimisë kulturore historike të komunitetit.

Kanë mision mbrojtjen, zhvillimin e identiteteve të komuniteteve.

Theksoj edhe njëherë, për Shqipërinë, një vend me nevojë jetike për zhvillim, njësitë e qeverisjes vendore janë investitorë kryesorë në zonat e komuniteteve.

Nuk ka ndodhur ndonjëherë një votë e tillë më inkriminuese sesa mbrëmë në orën 1:30 të natës.

Duke dënuar me forcën më të madhe këtë akt, PD deklaron se do të vazhdojë çdo betejë ligjore kundër ekzekutimit të 15 bashkive dhe për projektin e saj 100 bashki plus.

Në këtë kuadër, ne kemi nisur mbledhjen e firmave për referendum.

Do të studiojmë të gjitha modalitetet e referendumeve lokale dhe kombëtare, me të cilat ne kemi bindjen më të thellë se mbrojmë interesat e qytetarëve shqiptarë nga një bandë, nga një organizatë kriminale që quhet Parlament”, tha Berisha./ CNA