Turbulencat e forta plagosin 8 persona, devijohet fluturimi nga Nju Jorku për në Miami

Tetë persona u shtruan në spital në Miami këtë të premte në mëngjes, pasi një fluturim me destinacion New York City u devijua në Aeroportin Ndërkombëtar të Miamit pas raportimeve për turbulenca të forta, thanë autoritetet.

Zyrtarët e Aeroportit Ndërkombëtar të Miamit thanë se Avianca Flight 42 po udhëtonte nga Medellin, Kolumbi, për në Aeroportin Ndërkombëtar John F. Kennedy të Nju Jorkut kur u përball me turbulenca të forta.

Shërbimi i Shpëtimit nga Zjarri në Miami-Dade tha se avioni u ul në mënyrë të sigurt në Aeroportin Ndërkombëtar të Miamit rreth orës 3:30 të mëngjesit sipas orës lokale (07:30 GMT). Departamenti tha se tetë persona u plagosën, përfshirë një që kërkoi transportim në një qendër traumash.

Megjithatë, zyrtarët e linjës ajrore i thanë CBS News Miami se nëntë persona u plagosën në incident, përfshirë tre anëtarë të ekuipazhit dhe gjashtë pasagjerë.

Një pasagjere që ndodhej në Aeroportin Ndërkombëtar të Miamit ndërsa mbërriti fluturimi i Avianca tha se vuri re disa ambulanca që prisnin për të ndihmuar të plagosurit.

“Kur mbërritëm, kur u ulëm, pamë se shumë afër vendit ku do të zbrisnim, kishte më shumë se pesë ose gjashtë ambulanca. Shtatë prej tyre me dritat ndezur sikur po prisnin diçka”, tha pasagjerja Maria Paula Jimenez. “Kur mbërritëm, e dini, nuk ishte normale.”

Zyrtarët e Avianca thanë se ekipi i aeroportit të linjës ajrore po ndihmonte pasagjerët e mbetur me rregullimet për të vazhduar udhëtimin e tyre për në New York City.