Erdogan: Bota ka humbur besimin te OKB-ja, përpjekjet për zhbllokimin e Hormuzit kanë dështuar

Presidenti i Turqisë, Recep Tayyip Erdogan, ka shprehur keqardhje të thellë për faktin se përpjekjet e disa muajve për t’i dhënë fund ndërprerjes së lundrimit në Ngushticën e Hormuzit nuk kanë sjellë rezultatin e dëshiruar.

Gjatë fjalimit të tij në Samitin Ndërkombëtar të Drejtësisë, që u mbajt në Stamboll, Erdogan theksoi se marrëveshjet ndërkombëtare po humbasin gjithnjë e më shumë efektivitetin e tyre dhe se vendimet e gjykatave ndërkombëtare nuk po zbatohen më.

“Marrëveshjet ndërkombëtare kanë humbur efektivitetin. Po ashtu, vendimet e gjykatave ndërkombëtare nuk po zbatohen më,” deklaroi lideri turk.

Erdogan kritikoi ashpër sistemin aktual ndërkombëtar, duke vënë në dyshim legjitimitetin dhe drejtësinë e sistemit të Kombeve të Bashkuara.

Sipas tij, një sistem i OKB-së nuk mund të konsiderohet “legjitim dhe i drejtë” nëse nuk pasqyron vullnetin e komunitetit ndërkombëtar. Ai theksoi se struktura ku vullneti i mbi 190 vendeve nën ombrellën e Kombeve të Bashkuara varet nga vetëm pesë vende që kanë të drejtën e vetos, nuk është as e drejtë dhe as e shëndoshë.

Në fjalimin e tij, presidenti turk përmendi konkretisht “bllokimin” në Ngushticën e Hormuzit, nëpër të cilën kalon rreth 35 për qind e eksportit botëror të naftës, duke theksuar se ky problem nuk është zgjidhur për muaj të tërë, pavarësisht të gjitha përpjekjeve të bëra.

Ai e lidhi këtë situatë me një sërë krizash të tjera globale, duke përfshirë luftën Rusi-Ukrainë, konfliktet në Liban, Jemen, Somali, Sudan dhe veçanërisht situatën në Gaza, të cilën e cilësoi si “kampin më të madh të përqendrimit në botë”.

Erdogan theksoi se paqja dhe siguria ndërkombëtare nuk mund të vendosen pa drejtësi dhe se sistemi aktual ndërkombëtar ka pësuar erozion të thellë të besimit dhe prestigjit.

Sipas tij, misioni kryesor i sistemit ndërkombëtar duhet të jetë vendosja e paqes dhe sigurisë globale, por kjo nuk mund të arrihet pa drejtësi reale.

Këto deklarata vijnë në një kohë kur Ngushtica e Hormuzit, një pikë kritike për tregtinë botërore të energjisë, mbetet e prekur nga tensione të gjata që kanë ndikuar rëndë në rrjedhën e naftës dhe gazit natyror të lëngëzuar në shkallë globale.

Turqia ka qenë e angazhuar në përpjekje diplomatike për të lehtësuar situatën, duke ofruar ndihmë dhe duke mbështetur negociatat mes palëve të përfshira.