Bojkotuan stërvitjen, zbulohet vendimi i lojtarëve të Vllaznisë

Pas bojkotit të stërvitjeve dhe tensioneve të ditëve të fundit për shkak të vonesave të pagave, situata te Vllaznia i është rikthyer normalitetit.

Skuadra shkodrane ka zbritur në fushë për të zhvilluar seancën e radhës stërvitore nën drejtimin e trajnerit të ri hungarez, Kaba Lazo.

Protesta e futbollistëve lidhej me detyrimet e pashlyera nga klubi, të cilat shtriheshin në një periudhë prej katër deri në pesë muajsh. 

Për të zgjidhur ngërçin e krijuar, presidenti Alban Xhaferi dhe drejtori i ri sportiv, Alban Hasani, zhvilluan një takim me pjesëtarët e ekipit në kompleksin sportiv.

Vështirësitë financiare të klubit kanë prekur gjithashtu edhe Akademinë e Vllaznisë, ku trajnerët e moshave kanë detyrime të prapambetura që nga sezoni i kaluar.

Përveç problemeve jashtë fushës, Vllaznia përballet edhe me një start negativ në aspektin sportiv.

Në pesë javët e para të Superiores, skuadra shkodrane ka grumbulluar vetëm dy pikë, duke u pozicionuar në fundin e tabelës së klasifikimit.

Vëmendja e kampit kuqeblu zhvendoset tashmë te ndeshja e radhës në kampionat.

Vllaznia do të presë Dinamon më 11 tetor në stadiumin "Loro Boriçi", në një përballje ku kërkohet marrja e pikëve për të përmirësuar pozicionin në renditje.