Një aksident i rëndë në një nga komplekset më të mëdha industriale të Greqisë i ka marrë jetën një punëtori shqiptar, ndërsa një tjetër po lufton për jetën në spital. Ngjarja ndodhi të premten, më 9 tetor, në rafinerinë e kompanisë Motor Oil, në zonën e Agioi Theodoroi, pranë Korinthit.
Dy shqiptarët, të moshave 43 dhe 50 vjeç sipas raportimeve paraprake, po kryenin punime mirëmbajtjeje përmes një kompanie kontraktore që ofron shërbime në rafineri.
Shpërtheu një kapak metalik gjatë punimeve
Aksidenti ndodhi gjatë ndërhyrjeve në shkëmbyesit e nxehtësisë, në njësinë industriale U-607. Sipas të dhënave paraprake, çlirimi i gazit nën presion shkaktoi shpërthimin e një kapaku metalik. Ngjarja nuk u shoqërua me zjarr apo ndezje.
Përplasja shkaktoi dëmtime të rënda te dy punëtorët, veçanërisht në zonën e kokës. Një person i tretë pësoi lëndime të lehta dhe shfaqi vështirësi të lehta në frymëmarrje.
Dy të plagosurit rëndë u dërguan fillimisht në spitalin e Korinthit dhe më pas u transferuan në spitalin Thriasio. Megjithë ndërhyrjen e mjekëve, njëri prej tyre nuk arriti të mbijetonte. Ndërsa kolegu i tij vijon të jetë i intubuar në terapi intensive, në gjendje kritike.
Kompania Motor Oil konfirmoi zyrtarisht vdekjen e njërit prej punëtorëve, duke shprehur ngushëllimet për familjen dhe duke deklaruar se do ta mbështesë atë në këtë moment të vështirë. Gjithashtu, kompania bëri të ditur se po bashkëpunon me autoritetet për hetimin e ngjarjes.
Arrestohet kontraktori 59-vjeçar
Pas aksidentit, policia greke shoqëroi një kontraktor 59-vjeçar, përgjegjës për ekipin që po kryente ndërhyrjet në rafineri. Me urdhër të prokurorit, ai u arrestua.
Hetuesit po punojnë për të zbardhur shkaqet e shpërthimit dhe për të përcaktuar nëse gjatë punimeve janë zbatuar të gjitha rregullat dhe masat e sigurisë në fuqi.
Rafineria e Motor Oil ndodhet rreth 66 kilometra në perëndim të Athinës dhe është pjesë e një prej grupeve kryesore të sektorit të energjisë në Greqi. Aksidenti ka vënë në fokus sigurinë në punë në një kompleks industrial ku mirëmbajtja e pajisjeve kryhet në kushte me rrezik të lartë.
