Një tërmet i fuqishëm me magnitudë paraprake 7.7 ballë ka goditur Panamanë, duke shkaktuar dëme materiale dhe duke ngritur alarmin për rrezikun e cunamit në disa zona bregdetare.
Sipas Shërbimit Gjeologjik të Shteteve të Bashkuara (USGS), tërmeti mund të ketë shkaktuar dëme të konsiderueshme, ndërsa nuk përjashtohet mundësia e viktimave.
Pamjet e verifikuara nga CNN tregojnë ndërtesa të dëmtuara në Penonome, rreth 70 milje nga epiqendra. Në njërën prej videove shihet një kishë me kambanoren pjesërisht të shembur, ndërsa një ndërtesë tjetër ka pësuar dëmtime në fasadë.
Lëkundjet kanë shkaktuar ndërprerje edhe në transportin publik në kryeqytetin Panama City. Shërbimi në dy linja të metrosë është pezulluar, ndërsa pasagjerët janë evakuuar nga disa stacione.
Ministria e Arsimit ka anuluar mësimin në të gjithë vendin për pjesën e mbetur të ditës. Ndërkohë, mediat lokale raportojnë se aeroporti kryesor ndërkombëtar i Panamasë është mbyllur përkohësisht si masë paraprake.
Presidenti i vendit, José Raúl Mulino, u ka bërë thirrje qytetarëve të ruajnë qetësinë dhe ka kërkuar nga ministrat përkatës të informojnë mbi pasojat e tërmetit. Pas lëkundjes kryesore janë raportuar edhe tërmete pasuese pranë epiqendrës.
Sipas Sistemit Amerikan të Paralajmërimit për Cunami, përgjatë disa brigjeve të Panamasë mund të krijohen valë me lartësi nga një deri në tre metra.
Rreziku nga valë më të ulëta është paralajmëruar edhe për brigjet e Ekuadorit, Kilit, Kolumbisë, Kosta Rikës, El Salvadorit, Guatemalës, Hondurasit, Meksikës, Nikaraguas dhe Perusë.
Autoritetet po monitorojnë situatën, ndërsa priten informacione të mëtejshme mbi dëmet dhe pasojat e tërmetit./Versus.al
