Deklarata e fortë: Ka biseda mes Agasit dhe Ramës, jeta e Vlora Hysenit në rrezik

Ish-drejtori i Policisë së Shtetit, Shemsi Prençi, tha sot se në dijeninë e tij, ekzistojnë biseda mes kryeministrit Edi Rama dhe emrit të njohur për drejtësinë, Ergys Agasi.

I ftuar në emisionin “Në Shënjestër” me gazetaren Klodiana Lala, Prençi u shpreh se Agasi ka zhvilluar takim para arrestimit me një person që ishte nën masën e sigurisë ‘arrest me burg’.

Ai tha se kalimi i informacionit sensitiv tek bota e krimit ia rrezikon jetën ish-drejtueses së SHISH-it, Vlora Hyseni.

“Në dijeninë time, ka biseda mes kryeministrit dhe Ergys Agasin. SPAK e ka menduar mirë arrestimin e Vlora Hysenit në detyrë. Hyseni në dosje ka raportuar se do takohej disa herë me kryeministrin. Ndërkohë, për arrestimin e Agasit, desha të them se kishte dy javë që ndiqej. Agasi në disa raste shkonte në një klinikë private, për të takuar një person, që ishte në “arrest me burg”, por se ky shtetas merrte leje nga burgu. Ky person ka lidhje me pastrimin e parave të Agasit. Në këto kushte, SPAK i është drejtuar gjykatës, për ta lënë në “arrest shtëpie”. Në gjykimin tim, masa u dha e tillë, duke qenë se tashmë është përfolur se nuk duhet përdorur shumë masa e sigurisë “arrest me burg”. Kalimi i informacionit sensitiv tek bota e krimit ia rrezikon jetën Vlora Hysenit”,-deklaroi Prençi./CNA