Daniel Craig, aktori i njohur për rolin e James Bond, ka hyrë në një sipërmarrje të re larg Hollywood-it, duke u bërë bashkëpronar i një pub-i historik në Londër, i cili, sipas legjendave lokale, ka një fantazmë në bodrum.
Bëhet fjalë për lokalin “The Horseshoe”, në zonën e Clerkenwell, i cili daton rreth 250 vjet më parë. Craig e ka marrë përsipër këtë biznes së bashku me tre partnerë: Nick Jones, themeluesin e Soho House, restauratorin Charlie Carroll dhe Justin O’Shea, drejtues krijues i markës së birrës Bad Belze.
Historia më e pazakontë e pub-it lidhet me një fantazmë të quajtur Gilbert, që sipas ish-pronares Pauline Tucker, ishte dikur një xhelat vendas. Ajo pretendon se prania e tij ndihet ende në bodrumin e ndërtesës, ku thuhet se shfaqet herë pas here.
Tucker, e cila drejtoi lokalin së bashku me bashkëshortin e saj për 36 vjet, tregoi se pronarët e rinj nuk ishin informuar për këtë histori gjatë blerjes.
Nuk e sheh. E ndien
-u shpreh ajo, duke përshkruar legjendën që shoqëron pub-in prej vitesh.
Craig e priti me humor rrëfimin për banorin misterioz.
Nuk e di çfarë pi, por ndoshta duhet t’i lëmë një gotë birrë atje poshtë: ‘Ja ku e ke, Gilbert’
-tha aktori, duke iu referuar me shaka fantazmës së pretenduar.
Për aktorin, kjo sipërmarrje ka edhe një lidhje personale. Babai dhe gjyshërit e tij kanë drejtuar pub-e, ndaj ai është rritur mes ambienteve të tilla. Craig ka treguar se lokalet tradicionale kanë një rol të rëndësishëm në jetën e komunitetit, pasi u japin njerëzve mundësinë të takohen, të bisedojnë dhe të ndajnë përvojat e tyre.
Pronarët e rinj planifikojnë të rinovojnë ndërtesën gjatë një periudhe rreth njëvjeçare, duke ruajtur karakterin tradicional të saj. Projekti parashikon krijimin e një hapësire për restorant në katin e sipërm dhe përmirësimin e ambienteve të jashtme, ndërsa pub-i synon të mbetet një vend i hapur për publikun e gjerë.
Nuk ka prova të verifikuara për ekzistencën e fantazmës së Gilbertit, por historia e tij i shton një element misterioz këtij lokali historik, i cili tani nis një kapitull të ri nën pronësinë e aktorit të njohur.
