Shqipëria do të përfshihet këtë të shtunë nga kushte atmosferike të paqëndrueshme, me vranësira dhe reshje shiu, ndërsa në orët e pasdites dhe të mbrëmjes priten shtrëngata, shkarkesa elektrike dhe breshër në zonat e Ultësirës Perëndimore.
Sipas parashikimit të Shërbimit Meteorologjik Ushtarak, moti do të karakterizohet nga vranësira mesatare deri të dendura, të cilat do të shoqërohen me intervale të herëpashershme dhe afatshkurtra me diell, kryesisht përgjatë Ultësirës Perëndimore.
Reshjet e shiut do të jenë të herëpashershme dhe me intensitet të ulët gjatë gjithë ditës. Megjithatë, në Ultësirën Perëndimore, gjatë pasdites dhe mbrëmjes, ato pritet të intensifikohen deri në nivel mesatar, duke marrë formën e shtrëngatave të shoqëruara me shkarkesa elektrike dhe breshër.
Sa i përket erës, ajo do të fryjë nga drejtimi juglindje-jugperëndim, me shpejtësi mesatare 8 m/s. Në vijën bregdetare, zonat luginore dhe ato malore, era pritet të forcohet herë pas here, duke arritur shpejtësi deri në 17 m/s.
Për shkak të erës, në det parashikohet valëzim i forcës 3-4 ballë.