Presidenti amerikan Donald Trump shprehu sërish pakënaqësinë e tij për mosmarrjen e Çmimit Nobel për Paqen, njësoj si një vit më parë. Ai tha se “nuk kishte dëgjuar kurrë” për gjyqtaren e njohur nga Afrika e Jugut, Navi Pillay, e cila u shpall fituese e çmimit ditën e djeshme.
Të lidhura
None found
Gjatë një fjalimi në Syracuse, Trump deklaroi se nderimi duhej t’u ishte akorduar Shteteve të Bashkuara, të përfaqësuara prej tij si president.
“Kjo përbën një njollë të përhershme për Norvegjinë dhe për personat që morën një vendim të turpshëm e të pandershëm”, u shpreh ai. Sipas Trump, Çmimi Nobel për Paqen është komprometuar më shumë se kurrë nga një grup ideologësh radikalë, të cilët i cilësoi si “antidemokraci” dhe “në realitet armiq të qytetërimit”.
Republikani 80-vjeçar këmbënguli se e meritonte këtë vlerësim, duke pretenduar se kishte kontribuar në përfundimin e tetë luftërave. Kjo deklaratë vjen pasi ai nisi një luftë kundër Iranit në fund të shkurtit dhe urdhëroi më herët dërgimin e forcave speciale amerikane për kapjen e ish-Presidentit të Venezuelës, Nicolas Maduro, në janar.
Mbështetje për pretendimin e Trump kishte shprehur edhe udhëheqësja e opozitës venezueliane, Maria Corina Machado, fituese e Çmimit Nobel për Paqen vitin e kaluar. Ajo ia dorëzoi medaljen e saj të artë presidentit amerikan, duke deklaruar se ai “e meritonte”, veprim që e kënaqi dukshëm Trumpin.
