“Destinacionet e njohura turistike të Evropës vazhdojnë të tërheqin miliona vizitorë, por ekspertët e udhëtimeve sugjerojnë që turistët të shohin përtej zgjedhjeve tradicionale dhe të eksplorojnë alternativa që ofrojnë peizazhe mbresëlënëse, pasuri historike dhe përvoja autentike, shpesh me kosto më të përballueshme”, shkruan Kelli Acciardo në një artikull të botuar në median amerikane “Parade”.
Ndër destinacionet që rekomandohen si alternativa kundrejt vendeve më të famshme evropiane është edhe Riviera Shqiptare, e vlerësuar për ujërat e kristalta, fshatrat piktoreskë dhe çmimet konkurruese.
Destinacione si Santorini, Bregu i Amalfit dhe qytetet evropiane me arkitekturë përrallore kanë fituar famë ndërkombëtare për bukurinë dhe veçantinë e tyre.
Megjithatë, përtej këtyre vendeve të njohura, Evropa ofron edhe destinacione të tjera që mundësojnë përvoja po aq mbresëlënëse, duke u dhënë vizitorëve më shumë hapësirë për të eksploruar.
Në vend që të ndjekin itineraret tradicionale turistike, vizitorët mund të zgjedhin alternativa që ndërthurin peizazhet e bukura, gastronominë, historinë dhe kulturën evropiane, duke ofruar njëkohësisht mundësi për të shijuar udhëtimin në një mjedis më pak të mbipopulluar.
“Këshillohet të shqyrtohen alternativa më pak të njohura kundrejt destinacioneve turistike më të famshme”, thotë Anna LaBrie, këshilltare udhëtimesh në kompaninë “Going”.
Sipas saj, këto vende ofrojnë bukuri natyrore dhe pasuri historike, të ngjashme me ato të destinacioneve të njohura, por u krijojnë vizitorëve më shumë mundësi për t’i shijuar ato.
Përpara rezervimit të pushimeve në destinacione të promovuara vazhdimisht në rrjetet sociale, turistët rekomandohen të marrin në konsideratë edhe vende të tjera që meritojnë të vizitohen.
Ekspertët e udhëtimeve sugjerojnë katër alternativa që mund të jenë një zgjedhje interesante për pushimet në Evropë.
Nëse përfytyrimi juaj për Santorinin lidhet kryesisht me ujërat blu të kristalta dhe fshatrat piktoreskë të vendosur në shpatet mbi det, Shqipëria mund të jetë një surprizë e këndshme.
“Riviera Shqiptare shtrihet përtej detit Jon dhe ofron ujëra po aq të kristalta e blu, si dhe fshatra piktoreskë të vendosur buzë shkëmbinjve”, shprehet LaBrie.
Sipas saj, Riviera Shqiptare konkurron me ishujt grekë për nga bukuria, por me çmime dukshëm më të ulëta, ndërsa hotelet ekonomike dhe bujtinat lokale ofrojnë akomodime me çmime që nisin nga rreth 25 dollarë nata.
Kjo do të thotë më shumë mundësi për të shpenzuar për darka buzë detit dhe, potencialisht, më pak vizitorë që përpiqen të fotografojnë perëndimin e diellit në të njëjtin vend.
Sipas ekspertëve të udhëtimit, katër alternativat kundrejt destinacioneve të njohura turistike në Evropë janë:
Në vend të Santorinit, zgjidhni Rivierën Shqiptare
Në vend të Pragës, zgjidhni Krakovin
Në vend të Sintrës, zgjidhni Porton
Në vend të Bregut të Amalfit, zgjidhni Siçilinë
