Presidenti i Ukrainës, Volodymyr Zelensky, ka dënuar njoftimin e Donald Trump-it për një marrëveshje për importin e naftës ruse në SHBA.
Zelensky e quajti atë një dhuratë për presidentin rus Vladimir Putin, e cila barazohet me "një investim në një luftë që duhet t'i jepet fund, jo të zgjatet".
Trump tha se Putin kishte rënë dakord të lironte menjëherë 300,000 tonë naftë "për tregun amerikan dhe atë global", të ndjekura nga 500,000 tonë në nëntor dhe një milion të tjera më pas.
Mësohet se Departamenti Amerikan i Thesarit po pezullon sanksionet ndaj eksporteve ruse të naftës deri më 7 prill si pjesë e marrëveshjes, por asetet e tjera, si ato në bankat amerikane, mbeten të ngrira.
Në postimin e tij në "Truth Social", Trump shtoi se edhe tre milionë tonë të tjera naftë ruse do të dërgoheshin "brenda një periudhe të shkurtër", në varësi të gjendjes së rafinerive të saj, të cilat janë sulmuar nga Ukraina.
Më vonë, Putin tha se Rusia e cila kishte vendosur një ndalim të eksporteve të naftës në fillim të këtij viti ishte e gatshme të furnizonte si tregun amerikan ashtu edhe atë global me naftë dhe nënprodukte të saj, por deklarata e tij nuk specifikoi sasi konkrete.
Në një postim në rrjetet sociale, Zelensky tha se Rusia do ta shpërblente dërgesën e naftës me "terror të mëtejshëm".
"Ne mbështetemi te përkrahja e drejtë e Amerikës për mbrojtjen e jetës sonë, për mbrojtjen e njerëzve në Ukrainë dhe te fakti që Shtetet e Bashkuara të zhvillojnë një bisedë po aq të fuqishme me Rusinë. Një bisedë të fuqishme, jo të dobët," shkroi ai. Versus.al
