Presidenti amerikan Donald Trump ka zgjedhur Katie Zacharia, avokate dhe komentatore konservatore me lidhje të afërta me lëvizjen MAGA, për të marrë detyrën e sekretares së shtypit të Shtëpisë së Bardhë, në vend të Karoline Leavitt, e cila u largua nga posti në fund të gushtit për t’iu përkushtuar familjes pas lindjes së fëmijës së saj të dytë.
Zacharia, 42 vjeçe, është e angazhuar në komunikimin politik dhe ka punuar në kompaninë Trump Media & Technology Group, e lidhur me platformën Truth Social. Ajo është shfaqur shpesh në mediat konservatore amerikane, përfshirë Fox News dhe Newsmax, ku ka komentuar zhvillimet politike dhe qëndrimet e administratës Trump.
Ajo ka pasur gjithashtu një angazhim të shkurtër si zëdhënëse në Departamentin e Sigurisë Kombëtare, gjatë drejtimit të Kristi Noem. Karrierën e saj politike e nisi në Partinë Republikane dhe më pas u përfshi në organizata dhe fushata konservatore.
E diplomuar në drejtësi në Universitetin Pepperdine, Zacharia është pjesë e rrethit konservator që mbështet Trumpin dhe lëvizjen MAGA. Zacharia është e martuar me një producent filmash dhe kanë 4 fëmijë. Emërimi i saj vjen në një periudhë kur administrata amerikane kërkon të forcojë komunikimin publik dhe marrëdhëniet me median.
Karoline Leavitt u largua nga detyra në fund të gushtit, duke deklaruar se dëshironte të përqendrohej te familja pas ardhjes në jetë të fëmijës së saj të dytë.