Votimi i Territoriales/ Korreshi: Vdekja e demokracisë, duan ta kthejnë Divjakën në kooperativë bujqësore

Deputeti i PD-së, Saimir Korreshi, e konsideron si vdekje të demokracisë votimin e Reformës Territoriale.

Në një intervistë, Korreshi është shprehur se nuk mund të veprohej në atë mënyrë pasi Këshillat Bashkiakë kishin miratuar unanimisht mosshkrirjen e bashkive.

Deputeti tha se gjatë këtyre ditëve ka marrë mesazhe të shumta nga banorët e Fierit, Divjakës dhe Patosit, të cilët shprehen se mazhoranca kërkon ta kthejë Divjakën në kooperativë bujqësore.

“Ajo që nuk u pa dhe nuk u dëgjua ishte zëri i qytetarëve, i qarkut të Fierit, Divjakës dhe Patosit dhe 13 bashkive të tjera. Ajo natë ishte vdekja e demokracisë. Persona që ngrenë kartonët në dëm të interesit të qytetarëve. Divjaka prej 70-80 ditësh bërtiti fort dhe kërkonte të drejtën e saj. Nuk mund të veprojnë dhe të mandatojnë vullnetin e 15 bashkive ata 85 deputetë, pasi edhe Këshillat Bashkiakë kishin miratuar unanimisht mosshkrirjen e bashkive. Kishin votuar kundër kësaj nisme ligjore. Demokracia është përfaqësimi i zërit të qytetarëve.

Unë dje në mëngjes u ndjeva keq, pasi kam qindra SMS nga banorët e këtyre zonave. Shikoja trishtimin që u mblodh, pasi duan ta kthejnë Divjakën në kooperativë bujqësore, pasi ishte një qytet që merrej me bujqësi dhe turizëm”, ka deklaruar deputeti i PD-së, Saimir Korreshi./ CNA