Një 32-vjeçar është arrestuar në Shijak, pasi gjatë kontrollit në banesën e tij policia gjeti dhe sekuestroi dy armë zjarri automatike, municion luftarak dhe 32 500 euro.
Arrestimi u krye në kuadër të operacionit policor të koduar “Baza”, të organizuar nga specialistët për Hetimin e Krimeve në Komisariatin e Policisë Shijak, pas informacioneve se një shtetas mbante armë zjarri pa leje.
Në vijim të operacionit, policia ushtroi kontroll në banesën e shtetasit A. I., 32 vjeç, në fshatin Koxhas-Kodër, në Xhafzotaj të Shijakut.
Gjatë kontrollit, u gjetën dy armë zjarri automatike, dy krehra me nga 10 fishekë secili, si dhe një shumë prej 32 500 eurosh. Të gjitha sendet u sekuestruan në cilësinë e provës materiale.
Në përfundim të veprimeve, 32-vjeçari u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.